दाङ । तुलसीपुर ६ सुकौरा रोडको पानी टयाङ्की नजिकै रा. १ झ १४२ नम्बरको गाडीले प्र.२००१ प १६७९ नम्बरको स्कुटरलाई आज बिहान ९:२० बजे ठक्कर दिएको इप्रका तुलसीपुरका प्रवक्ता इन्स्पेक्टर सूर्य रानाले बताए ।
गाडीको ठक्करबाट स्कुटर चालक तुलसीपुर-५ का ४२ वर्षीय शंकर रेग्मी र उनकी नातिनी ४ वर्षकी प्रिन्स बुढाथोकी घाइते भएका छन् । शंकरको खुट्टामा र प्रिन्सको टाउको, छाती, मुख र निधारमा चोट लागेको छ । घाइते दुवैको राप्ती उपक्षेत्रीय अस्पतालमा उपचार भइरहेको छ ।
उक्त सरकारी गाडी यान्त्रिक शाखा प्रमुख रेवा रावतले चलाएकी थिइन् । गाडी दुर्घटना हुनेबित्तिकै रावत घटनास्थलबाट भागेको र चालकले नै गाडी चलाएको देखाएर घटना मोड्न खोजेको भन्दै स्थानीयले विरोध गरे ।
प्रहरीले रेवालाई नै पक्राउ गरेको छ । उनीसँग लाइसेन्स नभएको र ड्राइभरलाई सँगै राखेर सिक्दै गर्दा दुर्घटना भएको प्रहरीको भनाइ छ ।
