काठमाडौं । पाकिस्तानले प्रहार गरेको मिसाइललाई भारतले विफल बनाइदिएको छ । बिहीबार जम्मु कश्मिरस्थित हवाई अड्डामा पाकिस्तानले प्रहार गरेको मिसाइललाई भारतको डीफेन्स युनिटले विफल बनाइदिएको हो । युद्धका कारण सीमा क्षेत्रमा त्रास सिर्जना भएको छ ।
भारतीय सेनाले दिएको जानकारीअनुसार पाकिस्तानको एफ–१६ जेटलाई भारतले विफल बनाएको हो । भारतको एस–४०० डीफेन्स सिस्टमले पाकिस्तानले प्रहार गरेको ८ मिसाइललाई विफल बनाएको भारतीय सेनाले दाबी गरेको छ। यसैबीच धर्मशालामा भइरहेको इन्डियन प्रिमियर लिग (आइपीएल) को खेल पनि रद्द गरिएको छ । पञ्जाब र दिल्लीबीच भइरहेको खेल १०.१ ओभर खेलेपछि रद्द गरिएको हो । सुरक्षाको कारण देखाउँदै बीसीसीआईले खेल रद्द गरिएको जानकारी दिएको छ ।
भारतको पहलगाममा भएको आतंकवादी आक्रमणमा एक नेपालीसहित २६ जना पर्यटकको मृत्यु भएपछि भारतले पाकिस्तानमाथि जवाफी कारबाही गरेको थियो । पाकिस्तानको विभिन्न ९ क्षेत्रमा हवाई आक्रमण गरी भारतले आतंकवादको संरचनालाई परास्त गरेको बताएको छ । उक्त कारबाहीमा २६ जनाको मृत्यु भएको थियो भने ४६ जना घाइते भएका थिए ।
