धनगढी । सुदूरपश्चिम प्रदेश प्रहरी प्रमुख प्रहरी नायव महानिरीक्षक डम्बर बहादुर बिकले सुदूरपश्चिम प्रदेश प्रहरी गण धनगढीको निरीक्षण गर्नु भयो । सोही क्रममा उहाँले गणको कार्यालय भवन, बिभिन्न शाखाहरु, क्वाटर गार्ड, ब्यारेक, मेस समेतको निरीक्षण गर्नुका साथै कार्यरत प्रहरी कर्मचारीहरुलाई निर्देशन समेत दिनु भयो ।
निरीक्षण भ्रमणको क्रममा उहाँले देश तथा नागरिकलाई शीरमा राखि असल आचरण, आपसी सद्भाव तथा सामुहिक भावनाका साथ उच्च व्यावसायिक निष्ठा पुर्वक आफ्नो कर्तव्य निर्वाह गर्न सम्पुर्ण प्रहरी कर्मचारीहरुलाई निर्देशन दिनु भयो । संगठनले निर्दिष्ट गरेको मिडिया नीति बिपरित सामाजिक सञ्जालको दुरूपयोग नगर्न, गैह्र व्यवसायिक आर्थिक लाभका क्रियाकलापहरु र प्रहरी आचरण विपरीतका कुनै पनि गतिविधिमा संलग्न नहुन सचेत गराउनु भयो । सोही क्रममा उहाँले बल प्रयोग गर्दा मानव अधिकारको उच्च सम्मान र संरक्षण गर्दै व्यवसायिक, अनुशासित एवं कर्तव्यनिष्ठ भई कार्य सम्पादन गर्न र आफुलाई शारीरिक तथा मानसिक रुपमा स्वस्थ्य राख्न, आफ्ना व्यक्तिगत तथा व्यावसायिक समस्या तथा गुनासाहरु सिलसिलेवार रुपमा प्रतिवेदन गर्न निर्देशन दिनुहुदै प्रहरी कर्मचारीहरुका पिरमर्का र गुनासोहरु संगठनले तोके बमोजिमको बिधि र प्रक्रिया अनुरुप सम्बोधन गरिने कुरा समेत बताउनु भयो ।
कार्यक्रममा सुदूरपश्चिम प्रदेश प्रहरी कार्यालय धनगढीमा कार्यरत सिनियर प्रहरी अधिकृतहरु, सुदूरपश्चिम प्रदेश प्रहरी गण धनगढीका प्रमुख प्रहरी उपरीक्षक सरोज पौडेल लगायत उक्त गणमा कार्यरत सिनियर प्रहरी अधिकृत, जिल्ला ट्राफिक प्रहरी कार्यालय कैलालीका प्रमुख र जुनियर प्रहरी अधिकृत तथा अन्य प्रहरी कर्मचारीहरुको उपस्थिती रहेको थियो ।
