काठमाडौं । सिरहा प्रहरीले लागूऔषध खैरो हिरोइन कारोबार गर्ने दाजुबहिनीलाई पक्राउ गरेको छ । पक्राउ पर्नेमा लहान नगरपालिका-२२ बस्ने अन्दाजी ३२ वर्षका दिनेश कुमार यादव र उनकी बहिनी अन्दाजी वर्ष २६ की किरण कुमारी यादव रहेकी छन् ।
पक्राउ परेका उनीहरुलाई सिरहा प्रहरीले आज पत्रकार सम्मेलन गरी सार्वजनिक गरेको छ ।
पक्राउ परेका उनीहरुको साथबाट २०८.९० ग्राम खैरो हेरोइन बरामद भएको जिल्ला प्रहरी कार्यालय सिरहाका सूचना अधिकारी एवंम् प्रहरी नायब उपरीक्षक (डिएसपी) विरेन्द्र कुमार पासवानले जानकारी दिए । त्यस्तै ५४ लाख ६५ हजार ७३५ रुपैयाँ नेपाली, ३५ हजार ७८० रुपैयाँ भारु, ६ थान मोबाइल र डिजिटल तराजुसमेत बरामद भएको डिएसपी पासवानले बताए ।
गोप्य सूचनाको आधारमा लहान नगरपालिका-१२ भोटिया टोलबाट उनीहरुलाई नियन्त्रणमा लिइएको डिएसपी पासवानले बताए । उनीहरुलाई भोटिया चौकी, जिल्ला प्रहरी कार्यालय र लागूऔषध नियन्त्रण ब्यूरो गोलबजारको संयुक्त टोलीले नियन्त्रणमा लिएको हो ।
२ गते साँझ ७ बजेको समयतिर को ५ प ६९२७ नम्बरको पल्सर मोटरसाइकलमा हिँडिरहेको अवस्थामा शंका लागि चेकजाँच तथा सोधपुछ गर्ने क्रममा खानतलासी गर्दा निजहरुको शरीरबाट सेतो प्लाष्टिकसहित खैरो हिरोइन २२.९० ग्राम र प्लाष्टिकबिना २१ ग्राम सुरुमा बरामद भएको डिएसपी पासवानले बताए ।
जतिबेला उनीहरुको साथबाट ५१ हजार ४५० रुपैयाँ र दुई थान मोबाइलमात्र बरामद भएको थियो । पछि सोधपुछ गर्दै जाँदा उनीहरु बस्दै आएको घरको कोठाहरु खानतलासी गर्ने क्रममा प्लाष्टिकसहित १८६ ग्राम र प्लाष्टिकबिना १८० ग्राम खैरो हिरोइन बरामद भएको प्रहरीको भनाइ छ ।
त्यतिमात्र नभएर बाँकी ५४ लाख १४ हजार २८५ नेपाली रुपैयाँ र ३५ हजार ७८० भारुसमेत घरबाटै बरामद भएको डिएसपी पासवानले बताए । पक्राउ परेका उनीहरुविरुद्ध लागूऔषध मुद्दा दर्ता भई जिल्ला अदालतबाट ७ दिनको म्याद थप भई अनुसन्धान कार्य जारी रहेको सिरहा प्रहरीले जनाएको छ ।
यसअघि पनि यादव २०८० साउन १२ गते खैरो हिरोईन प्लाष्टिकसहित ४.४ ग्राम र प्लाष्टिकबिना ३.६ ग्रामसहित पक्राउ परेका व्यक्ति हुन् । जतिबेला लागूऔषध मुद्दामा असोज २४ गते अदालतले उनलाई कारागार चलान गरेको थियो । तर, माघ ५ गते ६ महिना कैद भुक्तान गरी उनी छुटेका थिए ।
यस्तै सिरहा प्रहरीले ३ गते अर्का २ जना व्यक्तिलाई समेत खैरो हेरोइनसहित पक्राउ गर्न सफल भएको छ । पक्राउ पर्नेहरुमा औरही गाउँपालिका ३ बस्ने २० वर्षीय कृष्ण कुमार यादव र तलसिपुर बस्ने १९ वर्षीय निरज राय रहेका छन् ।
उनीहरुलाई बरियारपट्टी गाउँपालिका ३ चमार टोलस्थित इप्रका बरियापट्टीबाट खटिएको टोलीले पक्राउ गरेको हो । भारत लदनियाबाट बरियारपट्टीतर्फ आउँदै गरेको मोटरसाइकल रोकी चेकजाँच गर्ने क्रममा उनीहरुको साथबाट ७१० मिलिग्राम खैरो हिरोइन बरामद भएको पत्रकार सम्मेलनमा जानकारी दिइएको थियो ।
जिनहरु दुवैजनालाई जिल्ला अदालतबाट ५ दिनको म्याद थप भई अनुसन्धान कार्य जारी रहेको सिरहा प्रहरीले जनाएको छ ।
