बाँके । नेपालगन्ज उपमहानगरपलिका वडा नम्बर २ को सहयोगमा नेपालगन्जको विभिन्न स्थानमा १० थान नो पार्किंग अंकित बोर्ड राखिएको नेपालगन्ज ट्राफिक कार्यालयका प्रमुख वरिष्ठ सई नन्द पोख्रेलले बताउनु भएको छ।
नेपालगन्जमा मानिसको सबैभन्दा बढी चाप हुने धम्बोझीस्थित बागेश्वरी गेट देखि त्रिभुवन चोकसम्म ७ थान र धम्बोझी चोक देखि सेतु बिक चोक सम्म ३ थान गरी १० स्थानमा नो पार्किंग अंकित बोर्ड लगाइएको वरिष्ठ सई पोख्रेलले जानकारी गराउनु भयो ।
नेपालगन्जको अव्यवस्थित पार्किंग व्यवस्थित गर्न स्थानीय व्यापारिसँगको सहकार्यमा हप्ताको ३-३ दिन गरी वन साइड पार्किंग व्यवस्थापन गर्न लागिएको पोख्रेल बताउनु हुन्छ । उहाँ भन्नुहुन्छ”अव्यवस्थित रुपमा पार्किङ गर्नेलाई पहिलो पटक सम्झाइन्छ,तर अटेरी गरेमा नियम अनुसार कारबाही गरिन्छ ।”
जथाभावी गरिने पार्किंग व्यबस्थित गर्ने ट्राफिकको यो कदमले ग्राहकलाई पार्किंग गर्न सजिलो हुने हुँदा यसलाई निरन्तरता दिनुपर्ने घरबारिटोलका कपडा व्यापारी भानु गौतमको भनाई छ । बेला बेलामा बोर्ड हराउने, चोरी हुने समस्याले पार्किंग अव्यवस्थित हुने गर्छ, बोर्ड चोरी गर्नेको पहिचान गरी कारबाही गरे चोरी हुने समस्या कम हुने व्यापारीहरु बताउँछन।
