काठमाडौं । तालिम नदिएको गुनासो आइरहेको भन्दै विभागले एक सूचना जारी गर्दै त्यस्तो नगरेको खण्डमा कारबाही गर्ने चेतावनी दिएको हो । अभिमुखीकरण तालिम सञ्चालन कार्यविधि, २०७६ बमोजिम दर्ता भएका संस्थाहरूले मापदण्ड पूरा नगरी तालिम सञ्चालन गरिरहेको गुनासो आएको विभागले जनाएको छ । 
जसले गर्दा वैदेशिक रोजगारीमा जाने कामदारहरू पर्याप्त मात्रामा सुसूचित हुन नसकेकोले सुरक्षित र मर्यादित रूपमा वैदेशिक रोजगारीको व्यवस्थापन नभएको गुनासो आउने गरेको विभागले जनाएको छ ।
त्यस्ता संस्थाहरूले वैदेशिक रोजगारमा जाने कामदारको लागि अभिमुखीकरण तालिम सञ्चालन गर्दा सबै प्रशिक्षार्थीहरू सबै सेसनमा अनिवार्य रूपमा उपस्थित भए/नभएको, तालिमको लागि आवश्यक पर्ने न्यूनतम भौतिक एवं अन्य स्रोतसाधन भए/नभएको सम्बन्धमा विभागले अनुगमन गर्ने जनाएको छ ।
नियमित एवं आकस्मिक रूपमा अनुगमन हुने र सो क्रममा मापदण्ड पूरा नभएको पाइएमा कार्यविधि बमोजिम कारबाही गरिने चेतावनी दिएको छ । अनुगमन गर्दा कार्यविधिको दफा २० बमोजिम अनुसूची–११ को चेक लिष्ट प्रयोग हुने जनाएको छ ।
