हैटौंडा। त्रिभुवन राजपथ सडकखण्ड अन्तर्गत मकवानपुरको थाहा नगरपालिका-३ स्थित विद्युत प्राधिकरणमा आज साँझ ७ बजे बसको ठक्करबाट २ जनाको मृत्यु भएको छ।
घटनामा अन्य ४ जना घाईते भएका छन्। घाईते मध्य २ जनाको अवस्था गम्भीर रहेको प्रहरीले जनाएको छ।
बसको ठक्करबाट हाल वतन नखुलेको अन्दाजी बर्ष ३५।४० का कृष्ण बलामी र सोही उमेरका लोकेन्द्रकुमार ठाकुरको मृत्यु भएको हो।
उनिहरुको प्राथमिक स्वास्थ्य केन्द्र पालुङमा उपचारको क्रममा साँझ ७ बजेर २५ मिनेट जाँदा मृत्यु भएको र शव सोही स्वास्थ्य केन्द्रमा रहेको प्रहरीले जनाएको छ।
त्यस्तै हाल वतन नखुलेको अन्दाजी बर्ष ३५/३६ का रघुनन्दन यादव र कमलेशकुमार साहको अवस्था गम्भीर रहेको छ। उनिहरुलाई उपचारार्थ काठमाडौस्थित ट्रमा सेन्टरमा पठाईएको छ।
घटनामा सामान्य घाईते भएका बाराको जीतपुर-सिमरा उपमहानगरपालिका-१७ का ३२ वर्षिय छेयाङ दोर्ज लामा र बाराकै कोल्हवी नगरपालिका-१ का ३० वर्षिय रामगुलाम चौधरीको प्राथमिक स्वास्थ्य केन्द्र पालुङमै उपचार भैरहेको छ।
प्रहरीका अनुसार गोपाली गाँउबाट थानाबजारतर्फ जाँदै गरेको बा ३ ख ५९९० नम्बरको बसको ब्रेक फेल भई सडकमा हिडिरहेका ब्यक्तिहरुलाई ठक्कर दिई थाहा नगरपालिकाका उप-मेयर भरत गोपालिको घर भित्र पसेको थियो।
ईलाका प्रहरी कार्यालय पालुङबाट प्रहरी निरीक्षक सबिनबाबु अर्यालको कमाण्डमा खटिएको प्रहरी टोलिले घाईतेहरुको उद्वार गरि अस्पताल तर्फ पठाएको जिल्ला प्रहरी कार्यालयका प्रहरी प्रवक्ता श्यामु अर्यालले जानकारी दिए।
बस चालक थाहा-५ बसन्त बस्ने बर्ष २९ का राजेश कार्की प्रहरी नियन्त्रणमा रहेको डिएसपी अर्यालले बताएका छन्।
