दाङ । गढवा गाउँपालिका वडा नं. १ मलमलामा आगामी आर्थिक वर्ष २०८२/०८३ का लागि सञ्चालन गरिने योजना तथा कार्यक्रमहरूको संकलन तथा छनोटका लागि अन्तरक्रिया कार्यक्रम तथा वडा भेला सम्पन्न भएको छ।
गढवा गाउँपालिका वडा नम्बर १ का वडाध्यक्ष बाबुराम अधिकारीको अध्यक्षता तथा गढवा गाउँपालिका अध्यक्ष यमनारायण शर्मा पोख्रेलको प्रमुख अतिथि तथा गाउँपालिका उपाध्यक्ष शारदाकुमारी चौधरीको बिशिष्ट आतिथ्यमा सम्पन्न भएको हो।
कार्यक्रममा गढवा गाउँपालिका वडा नम्बर १ बडहरा निवासी भीमबहादुर विश्वकर्माले मूर्ति निर्माणको क्षेत्रमा उत्कृष्ट मूर्तिकार भई नेपाल ललित प्रज्ञा प्रतिष्ठान काठमाडौँबाट सम्मानित हुनुभएकोमा हार्दिक बधाई ज्ञापन गर्दै मूर्तिकार भई विभिन्न क्षेत्रमा पुर्याउनु भएको योगदानको उच्च कदर गर्दै नगद सम्मान समेत गरेको छ।
गढवा गाउँपालिका वडा नं. १ वडा कार्यालयको आयोजनामा आयोजित उक्त कार्यक्रममा जनप्रतिनिधि, विभिन्न राजनीतिक दलका प्रतिनिधिहरू, बुद्धिजीवी, युवा, महिलाहरू, सामाजिक संघ–संस्थाका प्रतिनिधिहरू, किसान, शिक्षक तथा सर्वसाधारणको उल्लेखनीय उपस्थिति रहेको थियो ।
कार्यक्रमको सञ्चालन गढवा गाउँपालिका वडा नम्बर १ का वडा सचिव मधुसुदन पौडेलले गर्नुभएको थियो।
