पर्सा । मधेस प्रदेशका मुख्यमन्त्री सतिशकुमार सिंहले सोमवार पर्साको ड्राइपोर्ट–परवानीपुर सडकखण्डमा रहेको ढाटमा छड्के अनुगमन गरेका छन् । अनुगमनका क्रममा अवैध रूपमा सवारी कर असुली गरेको आरोपमा तीन जनालाई रंगेहात पक्राउ गरिएको छ ।
मुख्यमन्त्री सिंहले ठोरीको एक कार्यक्रममा सहभागी भएर वीरगञ्ज फर्कने क्रममा भारतीय नम्बर प्लेट भएका गाडीहरूमाथि तोकिएभन्दा बढी रकम असुली भएको गुनासोका आधारमा अनुगमन गर्न ढाटमा पुगेका थिए ।
अनुगमनमा ड्राइपोर्ट–परवानीपुर सडकखण्डमा राखिएका अस्थायी ढाटहरूमा अवैध असुली भइरहेको पाइएपछि तीन जनालाई पक्राउ गरी प्रहरीलाई बुझाइएको हो ।
पक्राउ पर्नेहरूमा पर्सा जिल्ला, वीरगञ्ज महानगरपालिका–२४ को रामगढवा टोल निवासी २९ वर्षीय आकाश पटेल, वीरगञ्ज –२२ जगरनाथपुर टोलका २६ वर्षीय रुपलाल सहनी र बारा जिल्लाको फेटा गाउँपालिका–४ फुलवारीया टोलका ४३ वर्षीय भरत प्रसाद साह रहेका छन् ।
पक्राउ परेकाहरूलाई वडा प्रहरी कार्यालय श्रीपुरमा हिरासतमा राखेर अनुसन्धान भइरहेको जिल्ला प्रहरी कार्यालय पर्साका प्रवक्ता, प्रहरी नायव उपरीक्षक (डिएसपी) किशोर लम्सालले जानकारी दिए ।
मुख्यमन्त्री सिंहले अवैध गतिविधिप्रति प्रदेश सरकारको ‘शून्य सहनशीलता’ नीति रहेको प्रस्ट पार्दै भने, “जनताको गुनासो सुनिन्थ्यो, आज प्रत्यक्ष देखियो । अब बलजफती कर र सवारीसाधनमाथिको दुर्व्यवहार सह्य हुने छैन ।”
प्रदेश सरकारले यसअघि पनि सीमा नाका र ढाटहरूमा हुने अवैध असुली नियन्त्रणका लागि पहल गर्दै आएको छ । सोमवारको छड्के अनुगमनलाई सरकारको कडा कारबाहीको सङ्केतका रूपमा हेरिएको छ ।
