काठमाडौं । दक्षिण सिरियाको स्वेइदा सहरमा बेडुइन सुन्नी जनजाति र ड्रुज धार्मिक अल्पसङ्ख्यक समुदायबिचको सशस्त्र झडपमा कम्तीमा ३० जनाको मृत्यु भएको छ । सिरियाको आन्तरिक मन्त्रालयका अनुसार झडपमा सय जना मानिस घाइते भएका छन् । तर मानवअधिकार समूहले भने झडपमा परेर कम्तीमा ३७ जना मरेको बताएको छ ।
गएको डिसेम्बरमा असदको शासन पतन भएयता देशभरमा अनेकौँ अल्पसङ्ख्यक समूहबिच झडप भइरहेको छ । नयाँ सरकारले यस्ता घटना नियन्त्रण गर्ने प्रयास गरिरहेको भए पनि स्थितिमा खासै सुधार आउन सकेको छैन ।
गएको वर्षको अन्त्यतिर ह्यात तहरिर–अल–शाम (एचटीएस) नेतृत्वको सुन्नी इस्लामी सशस्त्र समूहले दमस्कस कब्जामा लिएको थियो । यसपछि बशर अल–असद नेतृत्वको सरकार ढलेको थियो ।
झडपमा २७ जना ड्रुज र १० बेडुइन लडाकुहरू सहित ३७ जनाको मृत्यु भएको छ । प्रभावित क्षेत्रहरूबाट धेरै बासिन्दाहरू विस्थापित भएको र केही घरहरूमा आगजनी भएको भनिएको छ ।
स्वेइदाका गभर्नर मुस्तफा अल–बकुरले सबै पक्षलाई संयम अपनाउन र राष्ट्रिय सुधारको आह्वानमा प्रतिक्रिया जनाउन आग्रह गरेका छन् । ड्रुज धार्मिक नेताहरूले पनि हिंसा रोक्न र शान्ति कायम गर्न आह्वान गरेका छन् । एजेन्सी
