सर्लाही । सिरहाको सीमा क्षेत्र नवराजपुर गाउँपालिका–४ मा प्रहरीले गोली चलाएर एक भारतीय लागूऔषध कारोबारीलाई नियन्त्रणमा लिएको छ ।
भारतको मधुवनी जिल्ला, ग्रामपंचायत विरपुर–९ का ३८ वर्षीय श्यामसुन्दर पासवान पक्राउ परेका हुन् । उनको साथबाट प्रहरीले अन्दाजी ५० ग्राम खैरो हिरोइन बरामद गरेको छ ।
जिल्ला प्रहरी कार्यालय सिरहाका प्रवक्ता तथा डिएसपी विरेन्द्र पासवानका अनुसार, भारतबाट लागूऔषध नेपाल ल्याइँदैछ भन्ने गोप्य सूचनाका आधारमा प्रहरीको संयुक्त टोली सीमावर्ती क्षेत्रमा गस्तीमा खटिएको थियो । टोलीमा इलाका प्रहरी कार्यालय झाझपट्टीका प्रहरी नायब निरीक्षक (सई) रामबालक ठाकुर, जिल्ला प्रहरी कार्यालयका प्रहरी सहायक निरीक्षक शिव मैनाली, र लागूऔषध नियन्त्रण ब्युरो (गोलबजार) बाट खटिएको टोली सहभागी थियो ।
आज बिहान करिब ४ बजे भारतीय नम्बर प्लेट (BR 32 M 7338) को मोटरसाइकलमा आएका शंकास्पद व्यक्तिलाई प्रहरीले रोक्न खोज्दा उनी भाग्न प्रयास गरेका थिए । सो क्रममा प्रहरी नायब निरीक्षक ठाकुरले टाइप–७७ पेस्तोलबाट एक राउन्ड गोली फायर गरी उनलाई नियन्त्रणमा लिएका थिए ।
पक्राउ परेका पासवानको साथबाट लागूऔषध खैरो हिरोइनको अन्दाजी ५० ग्राम र प्रयोग गरिएको मोटरसाइकल बरामद गरिएको डिएसपी पासवानले बताए । प्रारम्भिक अनुसन्धानपछि उनलाई मोटरसाइकल र बरामद लागूऔषधसहित इलाका प्रहरी कार्यालय महेशपुरपतारमा बुझाइएको र घटनास्थलमा थप खानतलासी जारी रहेको जानकारी दिइएको छ ।
प्रहरीले सीमावर्ती क्षेत्रमा लागूऔषध कारोबारमा संलग्न गिरोहको निगरानी कडा बनाएको छ । पछिल्लो समयमा भारतीय सीमाबाट नेपालतर्फ लागूऔषधको ओसारपसार बढिरहेको पाइएपछि प्रहरीले गस्ती र निगरानीलाई थप सशक्त बनाएको बताइएको छ ।
