बिरगंज बासीहरु खानेपानीको चरम अभाव झेल्दै अहिले दैनिक एक करोड लिटर भन्दा बढी पानी आपूर्ति हुँदै
पर्सा । बिरगंज लामो समयदेखिको खडेरी र भू-जल सतह घट्दै जाँदा निम्तिएको पानी अभावलाई समाधान गर्न नेपाल खानेपानी संस्थान वीरगञ्ज शाखाको नगवास्थित पम्प स्टेसनमा नयाँ डिप वेल (बोरिङ) सञ्चालनमा आएपछि पानी आपूर्तिमा उल्लेखनीय सुधार देखिएको हो ।
संस्थानका इन्जिनियर तथा सूचना अधिकृत सञ्जीव यादवका अनुसार, नयाँ डिप वेलबाट दैनिक २० लाख लिटर पानी थप आपूर्ति भइरहेको छ । यसअघि शाखाले दैनिक ८० लाख लिटर पानी वितरण गर्दै आएकोमा अहिले त्यो आपूर्ति बढेर एक करोड लिटर पुगेको उनले जानकारी दिए । “नयाँ बोरिङबाट प्रतिमिनेट ३ हजार लिटर पानी उत्पादन भइरहेको छ,” उनले भने, “अहिले महानगरको माग अनुसारको तालमेल मिलाउँदै दैनिक आपूर्ति व्यवस्थापन भइरहेको छ ।”
पानी आपूर्तिमा सुधार भएसँगै ट्याङ्करमार्फत वितरणमा समेत कमी आएको छ । एक साता अघिसम्म दुई वटा ट्याङ्करले दैनिक ५० हजार लिटर पानी वितरण गर्दै आएकोमा अहिले एउटा ट्याङ्करले मात्रै सेवा दिइरहेको यादवले बताए । “ट्याङ्करको माग झन् कम हुँदै गएको छ, फोन गरेर पानी माग गर्ने क्रम पनि रोकिएको छ,” उनले थपे ।
हाल नेपाल खानेपानी संस्थान शाखाबाहेक वीरगञ्ज महानगरको दुई वटा, प्रदेश सरकारबाट उपलब्ध आठ वटा, डिभिजन वन कार्यालयको एकसहित करिब एक दर्जन ट्याङ्करहरू सक्रिय छन् । ट्याङ्करहरूले दैनिक पाँच लाख लिटरसम्म पानी वितरण गरिरहेका छन् ।
