काठमाडौँ । जिल्ला प्रहरी परिसर, काठमाडौँले करिब २० प्रतिशत जनशक्ति अभावकाबिच गत आर्थिक वर्षमा एक हजारभन्दा बढी विरोध प्रदर्शन तथा राजनीतिक कार्यक्रमको सुरक्षा व्यवस्थापन गरेको जनाएको छ ।
परिसरले आफ्नो वार्षिक कार्यसम्पादन सार्वजनिक गर्न बुधबार आयोजना गरेको पत्रकार सम्मेलनमा काठमाडौँ प्रहरी प्रमुख एसएसपी बिश्व अधिकारीले सीमित स्रोतसाधन र जनशक्तिका बाबजुद शान्ति सुरक्षा कायम गर्न प्रहरी अहोरात्र खटिएको जानकारी दिए ।
वर्गीकृत विज्ञापन
विज्ञापन पोस्ट गर्नुहोस् सबै हेर्नुहोस्
उनका अनुसार काठमाडौँ प्रहरीका लागि स्वीकृत ४ हजार १६ दरबन्दीमध्ये हाल ३ हजार २३३ जना मात्र कार्यरत छन् । जुन ८१५ जनाको प्रत्यक्ष अभाव हो ।
उनले भने, ’हामी स्वीकृत दरबन्दीभन्दा करिब २० प्रतिशत कम जनशक्तिमा काम गरिरहेका छौँ। ५६ वटा प्रहरी इकाईको दरबन्दीले थप ७३ वटा दरबन्दी नभएका इकाईलाई समेत धान्नुपर्ने अवस्था छ।’
गत आर्थिक वर्षमा मात्रै काठमाडौँमा १ हजार १८ वटा राजनीतिक तथा अन्य प्रकृतिका विरोधका कार्यक्रमहरू भएका थिए । जसमा ३ लाख ८६ हजारभन्दा बढी प्रहरी परिचालन भएको उनले जानकारी दिए ।
यीमध्ये ४४४ वटा धर्ना र ३७२ वटा विरोध प्रदर्शन थिए। एसएसपी पोखरेलले भने, ’देशभर हुने कुल घरनामध्ये ४२ प्रतिशत र विरोध र्यालीमध्ये २१ प्रतिशत काठमाडौँमा हुने गरेको तथ्याङ्कले यहाँको सुरक्षा चुनौतीलाई स्पष्ट पार्छ ।’ उनले सहकारी पीडित, शिक्षक महासङ्घ र राजनीतिक दलहरूका ठुला प्रदर्शनहरू सफलतापूर्वक व्यवस्थापन गरिएको स्मरण गरे ।
प्रहरीले सार्वजनिक गरेको तथ्याङ्कअनुसार गत वर्ष काठमाडौँमा २ हजार ७२२ वटा आगलागीका घटना भए। तीमध्ये १ हजार ८७६ वटा घटना (करिब ६९ प्रतिशत) बिजुलीको पोलमा तार सर्ट भएर भएको थियो ।
चुनौतीकाबिच प्रहरीले प्रविधिको प्रयोग बढाउँदै लगेको छ। प्रहरीको हटलाइन ‘१००’ मा गत वर्ष ४ लाख २८ हजारभन्दा बढी कल आएको थियो। प्रहरीको तथ्याङ्कअनुसार ४२ प्रतिशत घटनामा प्रहरी ५ मिनेटभित्र घटनास्थल पुगेको थियो भने २४ प्रतिशत घटनामा ५ देखि १० मिनेटभित्र पुगेको थियो ।
