काठमाडौं । नेपाल प्रहरीका महानिरीक्षक (आईजीपी) दिपक थापाले सहकारी ठगी प्रकरणमा राष्ट्रिय स्वतन्त्र पार्टी (रास्वपा) का सभापति रवि लामिछानेलाई ‘निर्दोष नै हो’ भन्न सकिने अवस्था नरहेको बताएका छन्।
उनले अदालतबाट जारी भएका आदेशहरूले नै लामिछानेको संलग्नतामाथि प्रश्न उठाएको संकेत गरे।
बुधबार नागरिक दैनिकका प्रधानसम्पादक गुणराज लुइँटेलले सोधेको प्रश्नको जवाफ दिँदै आईजीपी थापाले उक्त प्रकरणमा प्रहरीले सबुद प्रमाणसहितको बलियो मिसिल अदालतमा पेस गरेको स्पष्ट पारे।
‘रवि लामिछाने कति दोषी हुनुहुन्छ ?’ भन्ने प्रश्नमा आईजीपी थापाले भने, ‘म अनुसन्धान टोलीको नेतृत्व गरेको हुनाले सबै कुरा यहाँ भन्न सक्दिनँ। तर, पाँचवटा अदालतमा उहाँको केस दर्ता भएको छ र त्यहाँबाट आदेश पनि भएको छ। त्यो आदेशमा प्रस्ट लेखिएका हुनाले दोषी कति, निर्दोष कति मैले भन्न सक्ने अवस्था रहेन।’
उनले अदालतको आदेशको भाषा उद्धृत गर्दै थपे, ‘त्यहाँ (अदालतको आदेशमा) निर्दोष नै हो भन्न पनि सकिएन। मैले त्यहाँको भाषा नै उद्धृत गरेको हुँ।’
आईजीपी थापाले अनुसन्धानको अन्तिम निर्णय अदालतले गर्ने भए पनि प्रहरीले आफ्नो जिम्मेवारीअनुसार प्रमाण संकलन गरेरै मुद्दा अगाडि बढाएको बताए।
‘हामीले के-के प्रमाणहरू प्राप्त गर्यौं, संकलन गरेका प्रमाणहरूको परीक्षणसमेत गराएर मिसिल तयार गरी पठाएको हो,’ उनले भने, ‘अन्तिम फैसला हुँदाका बखत बल्ल आउला।’
आफू सीआईबी प्रमुख हुँदादेखि नै सहकारी प्रकरणको अनुसन्धानमा संलग्न रहेको बताउँदै उनले यस विषयमा प्रहरीले गहिरो अनुसन्धान गरेको र त्यसैका आधारमा कानूनी प्रक्रिया अगाडि बढेको स्पष्ट पारे।
