बारा । जिल्लाको सिमाना चुरियामाईस्थित पूर्व–पश्चिम (महेन्द्र) राजमार्गमा आज दिउँसो नेपाली सेनाको ट्रक दुर्घटना हुँदा १६ जना घाइते भएका छन्। घाइतेमध्ये ३ जनाको अवस्था गम्भीर छ।
जिल्ला प्रहरी कार्यालय मकवानपुरका अनुसार आज दिउँसो करिब २ः५० बजे तनहुँस्थित २ नम्बर राजदल गणबाट धनुषातर्फ गइरहेका ४ वटा सेनाका ट्रकमध्ये लु १ ग २८० नम्बरको ट्रक दुर्घटनामा परेको हो।
उपसेनानी हर्ष विक्रम अधिकारीको कमाण्डमा गइरहेका ट्रकहरूमध्ये एक ट्रक पुलबाट करिब १०–१२ फिट तल खोल्सामा खसेको मकवानपुर प्रहरीले जनाएको छ।
दुर्घटनापछि जिल्ला प्रहरी कार्यालय मकवानपुरबाट प्रहरी नायब उपरीक्षक श्यामु अर्यालको कमाण्डमा प्रहरी टोली, जिल्ला ट्राफिक कार्यालय, इलाका प्रहरी कार्यालय पशुपतिनगर, रातोमाटे प्रहरी चौकी र अमलेखगञ्ज (बारा)बाट खटिएका टोलीले नेपाली सेनासँगको सहकार्यमा उद्धार गरेका थिए।
उद्धार गरिएका १६ जना घाइतेलाई हेटौडा अस्पतालमा उपचारका लागि लगिएको प्रहरीले जनाएको छ। गम्भीर घाइतेमध्येका केहीलाई थप उपचारका लागि काठमाडौं पठाउने तयारी भइरहेको बताइएको छ।
प्रहरीका अनुसार घाइते सबैजना सैनिक पोशाक (युनिफर्म)मै रहेका थिए। दुर्घटनाको विस्तृत कारणबारे अनुसन्धान भइरहेको प्रहरीले जनाएको छ।
