।नवलपरासी । जेनजी आन्दोलनको अवसर छोपेर पश्चिम नवलपरासीका सरकारी कार्यालय र निजी सम्पत्तिमा भएको तोडफोड, लुटपाट र आगजनी घटनामा संलग्नमाथि तत्काल कानुनी कारबाही गर्न नवलपरासीका नेता तथा जनप्रतिनिधिहरूले सात दिने अल्टिमेटम दिएका छन्।
पूर्वमन्त्री हृदयेश त्रिपाठी, लुम्बिनी प्रदेशका वन तथा वातावरण मन्त्री देवकरण कलवार र प्रतापपुर गाउँपालिकाका अध्यक्ष उमेशचन्द्र यादवले संयुक्त पत्रकार सम्मेलनमार्फत प्रमुख जिल्ला अधिकारीलाई ज्ञापनपत्र बुझाउँदै घटनामा संलग्नलाई पक्राउ गरी कडा सजाय दिन माग गरेका हुन्।
मन्त्री कलवारले आफ्नो निवासमा समूह प्रवेश गरी लुटपाट र आगजनीसम्म गरिएको दाबी गर्दै यसमा अपराधीक समूह संलग्न रहेको आरोप लगाए। उनले प्रशासनले कारबाही नगरे जनप्रतिनिधिहरूकै पहलमा कदम चालिने चेतावनी दिए।
पूर्वमन्त्री त्रिपाठीले यो घटनालाई राजनीतिक आन्दोलन नभई शुद्ध आपराधिक गतिविधि भन्दै दोषीलाई तत्काल पक्राउ गर्नुपर्नेमा जोड दिए। उनले भने, “एक हप्ताभित्र कारबाही नभए जनतालाई हामीले रोक्न सक्दैनौँ, त्यसको सम्पूर्ण जिम्मेवारी प्रशासनले लिनुपर्छ।”
त्यस्तै प्रतापपुर गाउँपालिकाका अध्यक्ष यादवले घटनामा तस्करी र आपराधिक गतिविधिमा संलग्न समूहको संलग्नता रहेको दाबी गर्दै, प्रशासनले कानुनी कदम चाल्न ढिलासुस्ती गरे आफूहरू बाध्य भएर अघि बढ्ने चेतावनी दिए।
जनप्रतिनिधिहरूले आन्दोलनका क्रममा ज्यान गुमाएका युवाप्रति दुःख व्यक्त गर्दै आगामी दिनमा यस्ता अपराधिक समूहलाई संरक्षण नगर्न सबै सरोकारवालासमक्ष आह्वान गरेका छन्।
