बाँके । नेपालगञ्ज उपमहानगरपालिका भित्रका विभिन्न मेडिकलहरूमा EVAMINE (Pheniramine Maleate Injection I.P) नामक प्रतिबन्धित औषधिको खुलेआम बिक्री वितरण भइरहेको पाइएको छ।
स्रोतका अनुसार सो औषधि चिकित्सकको सिफारिसबिना, नशालु पदार्थको रूपमा प्रयोगका लागि पनि बिक्री भइरहेको छ। EVAMINE औषधि सामान्यतया एलर्जी नियन्त्रणका लागि चिकित्सकीय निर्देशनमा प्रयोग गरिन्छ। तर यसको दुरुपयोग गरी नशा अभिवृद्धि गर्न प्रयोग गर्ने प्रवृत्ति बढ्दै गएको छ।
नेपालमा लागुऔषध नियन्त्रण ऐन र औषधि ऐनले यस्ता इन्जेक्सन बिक्री गर्न स्पष्ट अनुमति र चिकित्सकीय प्रेस्क्रिप्सन अनिवार्य गरेको छ। तर हाल नेपालगञ्जका मेडिकलहरूमा सहज रूपमा बिक्री भइरहेको देखिँदा सम्बन्धित निकायको प्रभावकारी अनुगमन नहुँदा समस्या झन् गम्भीर बन्दै गएको स्थानीयवासीको आरोप छ।
प्रहरीको भनाइ
जिल्ला प्रहरी कार्यालय बाँकेका एक अधिकारीले भने, “हामीले यस्ता औषधिको दुरुपयोग सम्बन्धी सूचनालाई गम्भीरताका साथ लिएका छौँ। अनुगमन टोली खटाएर आवश्यक कारबाही अघि बढाइनेछ।”
औषधि व्यवस्था विभागको प्रतिक्रिया
औषधि व्यवस्था विभागका अनुसार Pheniramine Maleate Injection चिकित्सकको निर्देशनमा मात्र प्रयोग गर्न मिल्ने औषधि हो। विभागका एक प्रतिनिधिले भने, “प्रेस्क्रिप्सनबिना बिक्री गर्न पाईँदैन। बजारमा यस्ता औषधि खुलेआम बिक्री भइरहेको प्रमाण भेटिए तत्काल कारबाही हुन्छ।”
स्थानीय स्वास्थ्य शाखाको भनाइ
नेपालगञ्ज उपमहानगरपालिकाको स्वास्थ्य शाखाले पनि यस विषयमा ध्यानाकर्षण भएको बताउँदै, आवश्यक सहकार्यका लागि प्रहरी र औषधि विभागसँग समन्वय गरिने जनाएको छ।औषधि व्यवस्था विभाग र प्रहरीलाई निगरानी का साथ स्थानीयवासीले मेडिकल सञ्चालकहरूलाई कानुनी दायरामा ल्याउन र यस्ता औषधिको अवैध कारोबार रोक्न तत्काल कारबाही गर्न माग गरेका छन्।
