सागर थापा (क्राईमबिट)
माघ ४ सल्यान वाल विवाह रोक्न जिल्ला प्रहरी कार्यालय सल्यानले अर्को अभियान चलाएको छ ।
जिल्लाका पुरोहितहरुलाई बालविवाह रोक्न सचेतना गराएको प्रहरीले जनप्रतिनिधिलाई समेटेर हरेक घरमा टाँस्ने स्टिकर पनि टाँसिरहेका बेला अर्को नयाँ काम पनि थालेको हो ।
नयाँ र अन्यत्र नभएको जुक्ती निकाल्दै प्रहरीले जिल्लामा संचालित छापाखानामा विहेको निमन्त्रणा कार्ड बनाउदा जन्म मिति खुल्ने प्रमाणपत्र पेश गर्नुपर्नेछ ।
जिल्लाका छापाखाना संचालकले अवका दिनमा विवाह कार्ड छाप्दा जन्म मिति खुल्ने प्रमाण माग्नेछन र बर बधुको उमेर २० बर्ष पुगेको भएमात्रै विवाह कार्ड छाप्छन नत्र फिर्ता गरिदिन्छन । उनिहरुले शुक्रबार जिल्ला प्रहरी कार्यालयमा पुगेर वाल विवाह रोक्ने अभियानमा प्रतिवद्धता जनाएका छन ।
केटाकेटीको उमेर २० बर्ष पुगेमा मात्रै विहे गर्नुपर्ने भएकाले बाल विवाह रोकथाममा यो अभियानले पनि केहि सहयोग पुग्ने अपेक्षा रहेको सल्यान प्रहरी प्रमुख डिएसपी ढकेन्द्र खतिवडाले जानकारी दिएका छन । बाल विवाह गरेमा गर्ने, गराउने, विहेभोजमा सहभागि हुनेलाई ३ बर्ष कैद र ३० हजार जरिवाना भएको भन्दै छापाखानाले त्यसो नगरे परिवार तथा आफन्त संगै निम्ताकार्ड बनाउने पनि सजायको भागेदार हुनुपर्नेछ ।
समुदाय प्रहरी साझेदारी कार्यक्रम अन्तरगत यस्ता क्रियाकलाप गरिरहेको सल्यान प्रहरीले उमेर नपुगी विहे गर्नेको निम्तामा पुगी भोज खाएका फोटो प्रदर्शन गर्ने र तिनलाइ बधाइ दिनेलाई पनि बालविवाह गर्न प्रोत्साहन गरेको आरोपमा कार्वाही गर्ने गरी अभियान चलाउनेछ । त्यस्तै पत्रपत्रिका, रेडियो, अनलाइनमा निमान्त्रणा गर्न सहयोग गर्नेलाई पनि त्यो लागु हुने डिएसपी खतिवडाले बताए ।
उनले भने –“जिल्लाको बाल विवाह रोक्न हामीले यो अभियान चालेका हौ हामीले गरेमा समाजमा केहि गर्न सकिने भएकाले जसले जे सकिन्छ त्यो गरौ ।” उनले जिल्लामा स्थानिय सरकारसंगको सहकार्यमा जिल्ला प्रहरी, नजिकका प्रंहरी चौकी, विद्युत, एम्बुलेन्स जस्ता आवश्यक कार्यालयका फोन नं भएको स्टिकर टाँसिरहेको भन्दै केहि काम परे तत्काल सम्बन्धीत निकायमा फोन गर्न भनेका छन ।
उनले ति स्टिकरमा मान्छेलाई आत्महत्या हुनबाट रोक्न तथा बालविवाह रोक्न विभिन्न सन्देश पनि राखिएको बताए ।
