पर्सा । बिरगंज छठ पर्वको दोस्रो दिनको रूपमा आज खरना गर्नुअघि विधि अनुसार आवश्यक पर्ने सामग्री किन्नको लागि मानिसहरूको भिड लागेको हो ।
पहिलो दिन शनिबार नहाए खाएबाट सुरु भएको छठको दोस्रो दिनको साँझ पछि व्रतालुहरू निराहार व्रत बस्ने गर्छन् । यो व्रत मङ्गलबार बिहान उदाउँदो सूर्यलाई अर्घ्य दिएसँगै तोडिन्छ ।
लक्ष्मी पूजाको चार दिनपछि अर्थात् कात्तिक शुक्ल पक्षको चौथी तिथिका दिनबाट ‘छठ’पर्व विधिवत् रूपमा आरम्भ हुन्छ । यसका लागि चाहिने सामग्री हरियो तरकारी र फलफूल स्याउ, केरा, सुन्तला, पानी भएको नरिवल, भोगटे, उखु, हरियो बोडी, मूला, अदुवाको बोट पर्छन् ।
पूजाका लागि बर्तालु एवं श्रद्धालुले बाँसका सामग्रीमा कोनिया, ढाकी र नाङ्लो पनि खरिद गर्ने गर्दछन् । यस पर्वमा ठकुवा, भुसुना, घ्यूमा तयार पारेका अन्य मिठाइ पनि खाने गर्दछन् ।
