काठमाडौं । भारतको छत्तीसगढ राज्यको बिलासपुर जिल्लामा मङ्गलवार बिहान करिब १० बजेतिर कोरबा यात्री रेल र लाल खदान क्षेत्र नजिक बिलासपुर-कटनी खण्डमा स्थिर अवस्थामा रहेको मालवाहक रेलबिच ठूलो ठक्कर हुँदा ११ जनाको ज्यान गएको छ भने २० जना घाइते भएका छन् ।
मृतकहरूमा यात्रुहरू र रेल कर्मचारीहरू समावेश छन् र घाइतेमध्ये केहीको अवस्था गम्भीर रहेको छ । ठक्करका कारण यात्री रेलको इन्जिन र अगाडिका कोचहरू पूर्ण रूपमा कुच्चिएर विकृत भएका छन् ।
दुर्घटनाले ओभर हेड विद्युतीय तार र सिग्नलिङ प्रणालीमा व्यापक क्षति पुर्याउँदा सम्पूर्ण मार्गमा रेल यातायात अवरुद्ध भएको छ । यस क्षेत्रमा यसअघि पनि सिग्नलिङ समस्याका कारण साना दुर्घटनाहरू भएका रेकर्डहरू छन् ।
दुर्घटना लगत्तै रेलवे अधिकारीहरू, स्थानीय प्रशासन र राष्ट्रिय विपद् प्रतिक्रिया बल (एनडीआरएफ) को उद्धार टोली घटनास्थल पुगेका थिए । उद्धारका क्रममा एक शिशु सहित कैयौँ यात्रुहरूलाई सुरक्षित निकालिएको भारतीय सञ्चारमाध्यमहरूले जनाएका छन् ।
क्षतिग्रस्त भागले तत्काल निकाल्न कठिनाइ भएकाले गम्भीर घाइतेहरूलाई रेलभित्रै चिकित्सकहरूले प्रारम्भिक उपचार दिएका छन् भने घाइतेहरूलाई नजिकका अस्पतालहरूमा स्थानान्तरण गरिएको छ ।
दुर्घटनाको कारण पत्ता लगाउन रेलवेले छानबिन सुरु गरेको छ र प्रारम्भिक रिपोर्टहरूमा सिग्नलिङ फेलियर वा मानवीय त्रुटिको सम्भावना औँल्याइएको छ । रेल मन्त्री अश्विनी वैष्णवले उच्चस्तरीय छानबिन घोषणा गर्दै पीडित परिवारलाई क्षतिपूर्तिको आश्वासन दिएका छन् ।
दुर्घटनाले कैयौँ एक्सप्रेस र यात्री रेलहरू रद्द वा डाइभर्ट गरिएका छन् भने फसेका यात्रुहरूका लागि वैकल्पिक यातायात व्यवस्था गरिएको छ । एजेन्सी
