रुपन्देही । कार्तिक २१ र २२ गते जिल्लाका विभिन्न स्थानमा गरिएको चेकजाँचका क्रममा यी सामानहरु फेला परेका हुन् ।
बरामद गरिएका सामानहरूमा ऊनी कपडा, बालबालिकाका लुगाफाटा, मोबाइलका डिस्प्ले, ल्यापटप, रक्सीका बोतल र गाईको मूर्ती लगायत छन् । यस सम्बन्धमा एक जनालाई पक्राउ गरिएको छ । बरामद गरिएका सामानहरु आवश्यक कारबाहीका लागि भैरहवा भन्सार कार्यालय बेलहिया पठाइएको जिल्ला प्रहरी कार्यालय रुपन्देहीका सूचना अधिकारी तथा प्रहरी नायव उपरीक्षक सुरज कार्कीले जानकारी दिए ।
जिल्ला प्रहरी कार्यालय रुपन्देहीले रोहिणी गाउँपालिका-२ मैनिहवाबाट सन्दीप टेक्सटाइल्स लेखिएको ऊनी लेडिज कुर्ता, बच्चाको मोजा, टोपी, टाउजर सेट, हुडी र जेन्स मोजा गरी करिब १ लाख २५ हजार ८०० रुपैयाँ बराबरको सामान बरामद गरेको छ।
यसैगरी, इलाका प्रहरी कार्यालय बुटवलले तिलोत्तमा नगरपालिका-३ शंखनगरबाट स्याङ्जा वालिङका ५० वर्षीय जोग प्रसाद न्यौपानेले चलाएको IND AA 2085 99083UP 14NT 7066 नम्बरको ERTIGA कारबाट बिलबिजक नभएका अवैध सामानसहित पक्राउ गरेको छ । कारको सिटमुनि लुकाइएको अवस्थामा लेनोभो कम्पनीको ल्यापटप, चार्जर, झोला, ५ थान पहेंलो धातुको गाईको मूर्ती, ५ बोतल रकफोर्ड र ४ बोतल ओल्ड मंक रक्सीका साथै विभिन्न कम्पनीका मोबाइल डिस्प्लेका प्याकेटहरु र Mecfanic Solder paste लेखिएको गमको प्याकेट गरी कारसहित १८ लाख ४० हजार २२८ रुपैयाँ बराबरको सामान बरामद गरिएको छ ।
यसका अतिरिक्त, प्रहरी चौकी शिवपुर गोनाहा र मर्यादपुर रुपन्देहीबाट खटिएको संयुक्त टोलीले मायादेवी गाउँपालिका-५ गोनाहाबाट लु २२ प १२५७ नम्बरको मोटरसाइकलसहित ६० पिस ऊनी लेडिज सुट, १० पिस ऊनी सल, ४ रोल काँचो कपडा, १२ पिस लेडिज बाक्लो ऊनी सुट र ३६ मिटर काँचो कपडा गरी करिब ३ लाख २२ हजार २०० रुपैयाँ बराबरको सामान बरामद गरेको छ ।
