काठमाडौं । राष्ट्रिय प्रहरी प्रशिक्षण प्रतिष्ठान महाराजगंजमा प्रहरी निरीक्षक आधारभूत तालिम १-१८३औं समूहको दीक्षान्त समारोह सम्पन्न भएको छ। करिब १९ महिनाको कठोर प्रशिक्षण पूरा गरी दीक्षित भएका नयाँ अधिकृतहरूलाई सम्बोधन गर्दै प्रहरी महानिरीक्षक कार्कीले नेपाल प्रहरी इतिहासका अनेकौं उतारचढाव र कठिन परिस्थितिका बाबजुद पनि नागरिक सेवामा अनवरत खटिएको बताउनुभयो।
समारोहमा बोल्दै उहाँले प्रहरी संगठन जस्तोसुकै प्रतिकूलतामा पनि धुलो टकटकाएर र खरानीबाट उठेर पुनः नागरिककै सेवामा दत्तचित्त भई आफ्नो जिम्मेवारी निर्वाह गर्न सक्षम रहेको स्मरण गराउनुभयो । वर्तमान समयमा अपराधको अन्तर्राष्ट्रियकरण, संगठित अपराधको विस्तार र सूचना प्रविधिको तीव्र विकासले सिर्जना गरेका नवीन चुनौतीहरूको सामना गर्न दीक्षित अधिकृतहरू सक्षम र व्यावसायिक हुने विश्वास उहाँले व्यक्त गर्नुभयो।
महानिरीक्षक कार्कीले प्रहरी आम नागरिकले सुखमा भन्दा दुःख, पीडा र आपतविपतका बेला सम्झिने निकाय भएको उल्लेख गर्दै यो राज्य र नागरिकबीचको सेतु भएको बताउनुभयो। सात दशक लामो इतिहास बोकेको संगठनको सदस्य हुन पाउनु गौरवको विषय भए पनि यससँगै आउने जिम्मेवारी र चुनौतीका दायराहरू फराकिलो रहेको उहाँको भनाइ थियो। उहाँले नवनियुक्त अधिकृतहरूलाई संगठनको साख उच्च राख्दै नागरिकका समस्या समाधानमा सधैं अग्रपंक्तिमा रहेर काम गर्न निर्देशन दिनुभयो।
