बाँके । आसन्न प्रतिनिधिसभा निर्वाचन स्वतन्त्र, निष्पक्ष, भयरहित र विश्वसनिय ढंगले सम्पन्न गर्न बाँके जिल्लाको तयारी तथा सुरक्षा व्यवस्था सम्बन्धमा आइतबार स्थलगत अनुगमनमा पुगेका मन्त्री अर्यालले यस्तो बताएका हुन् ।
गृहमन्त्री अर्यालले हालसम्म बाँके जिल्लाको तयारी सन्तोषजनक रहेको र जिल्लाको परिवेश अनुसार सुरक्षा योजना प्रभावकारी ढंगले कार्यान्वयन गर्न निर्देशन दिए । साथै उनले निर्वाचन आचारसंहिताको पालना गर्न गराउन र कानुन उल्लंघन गर्नेलाई कानुनी दायरामा ल्याउन निर्देशन दिए ।
गृहमन्त्री अर्यालको नेतृत्वमा गृहसचिव राजकुमार श्रेष्ठ तथा नेपाल प्रहरी र सशस्त्र प्रहरी बल, नेपालका प्रहरी महानिरीक्षकहरुसहितको टोलीले बाँके जिल्लाको तयारी तथा सुरक्षा व्यवस्था सम्बन्धमा स्थलगत अनुगमन गरेको हो ।
अनुगमनको क्रममा बाँके जिल्लाको मुख्य निर्वाचन अधिकृत तथा निर्वाचन अधिकृतहरु, नेपाल प्रहरी तथा सशस्त्र प्रहरी बल नेपालको लुम्बिनी प्रेदेश प्रमुखहरु, जिल्ला सुरक्षा समितिका पदाधिकारीहरु, अनुगमन अधिकृतहरु लगायतको उपस्थिति रहेको थियो ।
उक्त कार्यक्रममा बाँकेका प्रमुख जिल्ला अधिकारी दिलकुमार तामाङले जिल्लामा हालसम्म भएका निर्वाचनसम्बन्धी गतिविधिहरु, एकीकृत निर्वाचन सुरक्षा योजना, सुरक्षाकर्मी परिचालन रणनीति, मतपेटिका ढुवानी योजना लगायतको विषयमा प्रस्तुतिकरण गरेका थिए । त्यस क्रममा गृहसचिव राजकुमार श्रेष्ठले सबै सुरक्षा निकायहरु आपसमा समन्वयात्म ढंगले समूह भावनाका साथ परिचालित भई निर्वाचन सफल बनाउन निर्देशन दिए ।
उक्त कार्यक्रमपछि गृहमन्त्री अर्यालले बाँकेस्थित पत्रकारहरुसँगको संक्षिप्त भेटघाटका क्रममा सम्बोधन गर्दै निर्वाचनको माहोल राष्ट्रिय रुपमै उत्साहजनक हिसाबले बढिरहेको र बाँकेके हालसम्मको तयारीलेसमेत त्यसैलाई पुष्टि गर्ने बताए ।
