दाङ । भालुवाङ लुम्बिनी प्रदेशको राजधानी क्षेत्र दाङ-देउखुरीकाे राप्ती गाउँपालिका वार्ड नम्बर ५, ६, ७ र ८ मा सिसी क्यामरा जडान तथा मर्मत र प्लाष्टिक न्यूनीकरणका लागि कार्यक्रम अगाडि बढाइएको छ । कपडाबाट निर्मित सपीङ झोला व्यवस्थापन गर्ने माग गर्दै सिसहनियाँ उद्योग बाणिज्य संघ, सिसहनियाँले आइतबार अपरान्ह राप्ती गाउँपालिकालाई ज्ञापन-पत्र बुझाएकाे छ ।
सिसहनियाँ उवासंघका अध्यक्ष इश्वरीप्रसाद अधिकारीकाे नेतृत्वमा बरिष्ठ उपाध्यक्ष मदन पाेख्रेल र उद्योग उपाध्यक्ष भागवत ज्ञवाली सहित गएकाे टाेलीले उक्त माग राख्दै राप्ती गाउँपालिकाका अध्यक्ष प्रकाश बिष्टलाई ज्ञापन-पत्र बुझाएकाे छ ।
ज्ञापन पत्रमा खासगरी साविककाे सिसहनियाँ गाविस तथा संघकाे कार्यक्षेत्र पर्ने हालकाे राप्ती गाउँपालिका वार्ड नम्बर ५, ६, ७ र ८ मा पर्ने सिसहनियाँ बजार, पिपरी बजार, मिलन चोक, पत्थरगढवा बजार लगायत अन्य व्यस्त बजार क्षेत्रहरुमा दिनानुदिन बढ्दै गरेका चोरीका घटना, सवारीका दुर्घटनाहरु तथा अन्य घटनाहरुलाई न्यूनीकरण गर्नको लागि त्यहाँ जडान भएका सिसी क्यामरा प्रयोगविहीन भएको अवस्थालाई मध्यनजरमा राखी उक्त क्यामरालाई मर्मत सम्मार गरी तत्काल प्रयोगमा ल्याउन तथा अन्य क्षेत्रमा नयाँ क्यामरा जडान माग गरेकाे छ ।
संघले राप्ती गाउँपालिका क्षेत्रलाई सफा र सुन्दर बनाउने उद्देश्यका साथ किनमेल गर्ने, बजार गर्ने, सामान प्याकिङ गर्दा प्लाष्टिकका झोला बढ्दाे प्रयाेगलाई नियन्त्रण गर्न राप्ती गाउँपालिकालाई ध्यानाकर्षण गराइएको छ ।
संघको ११ औं साधारण सभाले कपडाको पुनः प्रयोग हुने सपिङ झोलालाई प्रयोगमा ल्याउन सबैमा अनुरोध गर्ने निर्णय भए बमाेजिम कपडाको पुनः प्रयोग हुने सपिङ झोला तत्काललाई पाँच हजार थान व्यवस्थापन गरी सहयाेग गर्न पालिकालाई आग्रह समेत गरेकाे छ ।
ज्ञापन-पत्र बुझ्दै राप्ती गाउँपालिका अध्यक्ष प्रकाश बिष्टले प्रदेशको राजधानी क्षेत्र अर्थात राप्ती गाउँपालिकाभित्र यसै आर्थिक बर्षमा बिग्रेका सिसी क्यामरा मर्मत गर्ने र आवश्यकताका आधारमा नयाँ सिसी क्यामरा जडान गर्ने लक्ष्य रहेकाे जानकारी गराए । साथै अध्यक्ष बिष्टले प्लास्टिकजन्य झाेला नियन्त्रणका लागि कपडाकाे सपिङ्ग झाेला व्यवस्थापनका लागि स्थानीय सरकारकाे तर्फबाट पहल लिने प्रतिबद्धता जाहेर गरेका छन् । संघले प्लास्टिक झाेला नियन्त्रण गरि कपडाकाे झाेला प्रयाेगमा ल्याउन खाेज्नु नै सबैभन्दा स्वागतयोग्य बिषय भएकाे उल्लेख गर्दै अध्यक्ष बिष्टले उक्त कदमलाई सराहना गरे ।
ज्ञापन-पत्र बुझाउने कार्यक्रममा नेपाल पत्रकार महासंघ लुम्बिनी प्रदेशका सदस्य ओमप्रकाश गुप्ता, संघका प्रेस सल्लाहकार सन्ताेषकुमार गुप्ता, राप्ती गाउँपालिकाका प्रेस संयाेजक तुलबहादुर कँवर, पत्रकारहरू बिदुर एमसी, मुक्तिराम पाैडेल र माेतीराम भट्टराई लगायतकाे उपस्थिति रहेकाे थियाे ।
