दाङ । नेपाल पत्रकार महासंघका केन्द्रीय सचिव सविन प्रियासनले मुलुकको समृद्धिका लागि सञ्चारको बलियो सहभागिता हुनुपर्ने बताउनुभएको छ। थुर्पा अनलाइनले मङ्गलबार घोराहीमा आयोजना गरेको शुभकामना आदानप्रदान एवं क्यालेन्डर विमोचन कार्यक्रमको उद्घाटन गर्दै प्रमुख अतिथि समेत रहनुभएका प्रियासनले संचार क्षेत्र सृजनशीलताको अगुवाई गर्ने बलियो माध्यम भएका कारण सञ्चारको सहभागिता बिना मुलुकको समृद्धि असम्भव र दीर्घकालीन हुन नसक्ने बताउनुभयो ।नेपाली सञ्चार क्षेत्रले मुलुकलाई गतिशील बनाउनको लागि सदैव भूमिका निर्वाह गरेको स्मरण गर्दै नेपाललाई सही बाटोबाट अगाडि बढाउन नेपाली सञ्चारले सधैंभरि सहभागिता जनाउने बताउनुभयो । पछिल्लो समय संचारमा डिजिटल प्रविधि भित्रिएको बताउँदै यसलाई बहु उपयोगी बनाउन नेपाल पत्रकार महासंघले प्रभावकारी कार्यक्रमहरू लागु गरेको जानकारी दिनुभयो । सम्पूर्ण संचारकर्मीहरूको एकता नै आजको आवश्यकता भएको बताउँदै पत्रकारितालाई सबै पक्षसँग जोड्नको लागि पत्रकार महासंघ कतिबद्ध भएर अघि बढेको प्रियासनको भनाइ छ । अनलाइनका सञ्चालक कैलाश घर्ती मगरको अध्यक्षतामा सम्पन्न कार्यक्रममा विशिष्ट अतिथि नेपाल पत्रकार महासंघ दाङका अध्यक्ष सन्तोष सुवेदी, मगर सङ्घ दाङका अध्यक्ष मुक्त बुढा, दाङ देउखुरी होटल व्यवसायी समितिका अध्यक्ष ईश्वर बुढा लगायतकाले बोल्नुभएको थियो। कार्यक्रमको सहजीकरण सन्तबहादुर रोकाले गर्नुभएको थियो।
