वीरगञ्ज । रौतहट जिल्ला प्रशासन कार्यालयबाट बविता जैसवालको नाममा जारी गरिएको सार्वजनिक चिन्हको सवारी पास प्रयोग गर्दै प्रदेश २–०२–००१ झ ००५९ नम्बरको सरकारी गाडी वीरगञ्ज महानगरपालिका–१५, सिद्धार्थ टोल क्षेत्रमा फेला परेपछि पर्सा ट्राफिक प्रहरीले नियन्त्रणमा लिएको छ।
उक्त गाडीमा प्रिन्टरलगायतका कार्यालय सामग्री बोकेको अवस्थामा फेला परेको थियो। प्रारम्भिक सोधपुछका क्रममा गाडीमा रहेका चालक (गुरुजी)सँग ती सामानको बिल वा खरिदसम्बन्धी कागजात नभएको बताइएको छ। साथै, पर्यटन बिकास कार्यालय गौरका प्रमुख बविता जैसवालले गाडी मर्मतका लागि आएको जानकारी दिएकोछ।
सवारी पासको प्रयोग, सामान ओसारपसारको वैधता, आवश्यक कागजात तथा ट्राफिक नियम पालना भए/नभएको विषयमा थप अनुसन्धानका लागि गाडीलाई पर्सा ट्राफिक प्रहरी कार्यालयमा लगिएको छ। ट्राफिक प्रहरीले अनुसन्धानपछि आवश्यक कानुनी प्रक्रिया अघि बढाइने जनाएको छ।
