बुटवल फागुन १८ पछिल्लो समय नेपालमा सबैभन्दा बढी भ्रष्टाचार स्थानीयतहमा हुने गरेको अख्तियार दुरुपयोग अनुसन्धान आयोग बुटवलले खुलासा गरेको छ । आयोगले भ्रष्टाचार नियन्त्रणकालागि अख्तियारले दिएको सुझाव स्थानीय तहले कार्यान्वयन नगरेको मात्र भनेको छैन स्थानीयतहका जनप्रतिनिधिहरुले कुनै न कुनैरुपमा अख्तियार दुरुपयोग गरेको समेत ठहर गरेको छ ।
अख्तियारले आज बुटवलमा सञ्चारकर्मीहरुसंग अन्तरक्रिया गर्दै अनुसन्धानका क्रममा कुनैपनि राजनितीक प्रभाव र दबाबमा नपरि कसुर गर्ने कसैलाई पनि नछाड्ने प्रतिबद्धता समेत ब्यक्त गरेको छ । अन्तरक्रियामा बोल्दै आयोगको बुटवल ईकाईका प्रमुख डा. भिष्मकुमार भुषालले आफ्नै पुर्व आयुक्तहरुलाई समेत नछाडेको अख्तियारले कसैलाई नटाड्ने दृढता ब्यक्त गर्नुभयो । उहांले परेका मुद्दाहरु परिपक्क नभई सार्वजानीक गर्न नसकिने बताउंदै अख्तियारको अनुसन्धान प्रकृतिका कारण तत्काल सुचना दिन नसकिने स्पष्ट पार्नुभयो । प्रमुख भुषालले आगामी दिनमा सुचना र मिडीयाको हकमा सहज वाताबरण बनाईने बताउनु भयो ।
अन्तरक्रियामा कार्यपत्र प्रस्तुत गर्दै आयोगको बुटवल इकाईका उपसचिव रमेश ढकालले अख्तियारको अनुसन्धानमा नागरिकले सुशासनको अनुभुति गर्न नसकेको पाईएको बताउनु भयो । ढकालले स्थानीय तहले अख्तियारले दिएको सुझाव कार्यान्वयन नगरेको बताउंदै आयोगमा परेको उजुरीमा पनि सबैभन्दा बढी स्थानीयतहकै रहेको जानकारी दिनु भयो ।
कार्यक्रममा सहभागिहरुले आयोग मिडीया मैत्री बन्न नसकेको, ठूलो भ्रष्टाचारमा अख्तियार सफल हुन नसकेको तथा आयोगको अनुसन्धान प्रभावकारी नभएको टिप्पणी गरेका थिए ।
अन्तरक्रियामा बितरित कार्यपत्रका अनुसार आयोगको बुटवल कार्यालय अन्तर्गत सबैभन्दा बढी स्थानीय तहमा भएको भ्रष्टाचारको उजुरी पर्ने गरेको छ । आर्थिक वर्ष ०७६।७७ मा अख्तियार बुटवल कार्यालयले १ हजार ९९ उजुरी मध्य ५८३ उजुरीको फस्र्यौट गरेको छ भने २२ वटा स्ट्रीङ अप्रेशन गरि १० लाख ६२ हजार ५५ रुपैयां असुल उपर गरेको छ । उजुरीमा कुल १०९९ उजुरी मध्य स्थानीयतहको मात्र ३९३ उजुरी अख्तियारको बुटवल कार्यालयमा दर्ता भएकाछन् । मुद्दाको प्रकृतिमा शिक्षामा ३०२, भुमिसुधारमा ११५बन तथा बातावरणमा ५६, गृहमा ३४ मुद्दा कार्यालयमा दर्ता रहेकाछन् । अख्तियारमा सबै भन्दा बढी रुपन्देहीमा र सबै भन्दा कम रुकुम पुर्वमा उजुरी आउने गरेको समेत आयोगले जनाएको छ । आर्थिक वर्षको माघ मसान्त सम्म रुपन्देहीमा ३५०, कपिलवस्तुमा २११, नवलपरासी पश्चिममा १५९, अर्घाखांचिमा ८९ मुद्दा अख्तियारमा परेकाछन् ।
