(बिदुर एमसी) दाङ चैत २९ भालुवाङ देउखुरीस्थित राप्ती गाउँपालिका वडा नम्बर २ का वडा सदश्य लालबहादुर चौधरीले ८ जना यात्रुलाई खाना खुवाएका छन् । चौधरीले आफ्नो घरमै पकाएर ल्याएको भात, दाल, आलुको तरकारी र अचार ल्याएर भालुवाङ्ग पुल्चोकस्थित राप्ती समितिको काउण्टरनेरकाे यात्रु प्रतिक्षालयमा ती यात्रुहरूको अगाडि राखिदिए । रुपन्देहीको बुटवलबाट पैदलमार्ग हिडेर आएका ती ८ जनाको सङ्ख्यामा रहेका यात्रुहरूले आफ्नै हातमा डाडु पन्यु लिएर थपि थपि खाना खाए ।त्यतिबेलासम्म ती वडा सदश्य चौधरी त्यहीँ उभिएका थिए । जतिबेला सञ्चारकर्मिहरु त्यहाँ पुगेका थिए ।उनीहरू बुटवलबाट आफ्नो घर धेरैजसोले बर्दिया र केहीले कैलाली जाने बताएका छन् । तत्पश्चात त्यहाँ ड्युटीमा तैनाथ सुरक्षाकर्मिहरुले उनीहरूलाई पूर्वतर्फबाट आएको मालवाहक ट्रकमा बसालेर गन्तव्यमा जानका लागि पठाइदिएका थिए ।
