(ABC-Sanchar)
काठमाडौं । सेनाका जवान, जेल बसेको ३० महिनापछि नेपाली सेनाका दुई जवानहरु जेल बसेको ३० महिनापछि निर्दोष ठहरिएका छन्। हतियार चोरी प्रकरणमा दोषी ठहरिएका उनीहरु सैनिक विशेष अदालतको शुक्रबारको फैसलामा भने निर्दोष ठहरिएका हुन्।
सेनाले हतियार चोरीको मुख्य योजनाकार भनी अमल्दार पोष्टमा कार्यरत लवकुमार गुरुङ र सरोज तामाङलाई कोट मार्सल गरेको थियो। गंगाधर ढकालले चोरेर लुकाएको हतियार लव र सरोजले चोरेको भनी बयान प्रमाणित गरिएको थियो। हालसम्म लव र सरोज भरतपुर कारागारमा रहेका थिए।
सेनाकै गंगाधर ढकालले सहकर्मी भरत गुरुङको साउन ७ गते हत्या गरेपछि चोरी भएको हतियारबारे रहस्य बाहिरिएको थियो। चोरी भएको र भरतको हत्यामा प्रयोग भएको हतियार (१००७९२ र वट नं ख २५) एउटै भएपछि घटनाले नया मोड लिएको थियो। हत्या आरोप लागेका गंगाधरविरुद्ध बिहीबारको फैसलाले २५ वर्ष कैद तोकेको छ।
०७५ साल पुस ४ गते लव र सरोजमाथि हतियार चोरीको आरोप लागेको थियो। त्यतिखेर समरी अदालतबाट उनीहरु ०७५ चैत २८ गते कारागार चलान भएका थिए। लवकुमारलाई १० र सरोजलाई ७ वर्षका लागि जेल सजाय तोकिएको थियो। चोरी भएको हतियार बेचेको आरोपमा दुई सर्वसाधारण तारा तामाङ र पवन गुरुङले भने सफाइ पाएका थिए।
हतियार चोरी घटनामा लव र सरोज संलग्न भएको जबरजस्त पुष्टि गराएको सेनाले चोरी भएको हतियार बिक्री गर्नमा भने तारा तामाङ र पवन गुरुङ संलग्न भएको भनी चितवन प्रहरीलाई अनुसन्धानका लागि पत्र पठाएको थियो। उदयपुर चौदण्डीगढी नगरपालिका–९ का २१ वर्षीय पवन लवको नाताले सौतेनी भाइ हुन भने उदयपुरकै त्रियुगा नगरपालिका–४ की २८ वर्षीया तारा लवकी जेठी सासू हुन्।
त्यतिखेर चोरी भएको हतियार कहिले परालको टौवामुनि त कहिले खेतको ह्युम पाइपमा लुकाएर राख्ने गरेको गंगाधर ढकालले बयान दिएका थिए। ३० महिनासम्म निर्दोष व्यक्तिहरुले अनाहकमा कारागार सजाय भोग्दा चोरी गर्ने सेनाभित्रकै फरक व्यक्ति रहेको पुष्टि भएपछि सेनाभित्रको न्यायिक अनुसन्धान प्रकृयामा प्रश्न उठेको छ।
