ABC (क्राईमबिट)
काठमाडौं । जुवाडे’बाट बरामद गरेको चेकमा महानगरीय प्रहरी परिसर काठमाडौँले मुद्दा चलाउनुको साटो आरोपीलाई नै फिर्ता दिएको आरोप लागेको छ । असोज २५ मा काठमाडौँ प्रहरीले सुभाष भेटवालबाट २ करोड २९ लाख बराबरको बैंक अफ काठमाडौँको चेक बरामद गरेको थियो । सो चेक जुवा खालमा काटेको र जुवा खेलेको सिसिटिभी फुटेजमा देखिए पनि प्रहरीले मुद्दा चलाउन अस्वीकार गर्दै चेक फिर्ता दिएको आरोप लागेको हो । 
असोज २२ मा सिन्धुलीका राजकुमार बराल र सुभाष भेटवाल बानेश्वरस्थित ‘९९ आना’ नामको घरजग्गा कारोबार गर्ने अफिसमा जुवा खेलेका थिए । त्यहाँ आफूलाई बोलाएर मदिरामा अखाद्य वस्तु मिसाएर खुवाएको र ७ थान चेक चोरेको भन्दै बरालले भोलिपल्ट महानगरीय प्रहरी वृत्त बानेश्वरमा उजुर गरेका थिए । बानेश्वर प्रहरीले चेक नभेटिएको जानकारी दिएपछि बरालले महानगरीय प्रहरी परिसर काठमाडौँमा उजुरी दिए ।
काठमाडौँका तत्कालीन एसएसपी अशोक सिंहले चेक चोरेको आरोप लागेका सुभाष भेटवाललाई बोलाएर चेक फिर्ता लिएर आफैँ राखेका थिए । ‘९९ आना’को सिसिटिभी फुटेज हेर्दा बरालको चेक अर्का जुवाडेले भरेको देखिएको अनुसन्धानमा संलग्न एकजना प्रहरी अधिकृतले रातोपाटीलाई बताए । प्रहरीले सो कार्यालयमा छापा मारेर केही बुक तास, किताब र सिसिटिभी फुटेज पनि लिएको थियो । जुवा खेलेको र खेलाएको फुटेज प्रमाण भए पनि एसएसपी सिंहले मुद्दा अघि बढाउन अस्वीकार गरेर लामो समय चेक आफैँसँग राखेको आरोप छ ।पुस २ मा सरुवा भएर अर्का एसएसपी सुदीप गिरी काठमाडौँमा हाजिर हुन आए । गिरीलाई स्वागत गरेर हिँड्ने बेलामा सिंहले आरोपी भेटवाललाई बोलाएर २ करोड २९ लाखको चेक फिर्ता बरालको दाबी छ । चेक फिर्ता लिएर भेटवालले बैंकमा बाउन्स गर्न गराउन गएको कुरा बैंकले खबर गरेपछि आफूले थाहा पाएको राजकुमार बरालले रातोपाटीलाई बताए । उनले भने–‘मलाई बोलाएर एसएसपीले पटक–पटक पैसा तिर्न मानसिक दबाब दिएका थिए, मैले मुद्दा चलाउनुस् भन्दा सम्पत्ति शुद्धीकरण लाग्छ भनेर पनि धम्क्याए ।’
बैंकबाट पनि ती चेक ‘ब्लक’ गराएको र प्रहरी कार्यालयमा उजुर गरेको बरालको भनाई छ । यसबारे प्रहरी वरिष्ठ उपरीक्षक (एसएसपी) अशोक सिंह भन्छन्–‘मुद्दा चलेको छैन, मेरो अचानक सरुवा भएको हुनाले मुद्दा शाखाले चेक फिर्ता गरेको होला, त्यसमा मेरो संलग्नता छैन ।’ 
सिसिटिभी फुटेज अनुसार जुवा खेलेको र चेक लेनदेन गरेको देखिएको सिंहले बताए । उनले भने–‘त्यतिबेला राजकुमार बरालले चोरी भएको निवेदन दिएका थिए तर, चेक आफैँले दिएको फुटेजमा देखिएको हुनाले मुद्दा चलाउन सकिएन ।’
एसएसपी सिंहको आदेशमा मुद्दा शाखाका तत्कालीन डिएसपी नरेन्द्र चन्दले चेकको लेखाई र लेनदेनको आधार बारे अनुसन्धान नै गरेनन् । अनि, आफू हिँड्नुअघि सिंहले पीडित पक्षलाई जानकारी नै नदिई चेक फिर्ता दिए । प्रहरीले चेक बाउन्स मुद्दामा रकमको स्रोत माग्ने गर्छ । तर, सो घटनामा प्रहरीले भेटवालसँग रकमको स्रोत मागेको छैन । बरालले शुक्रवार गृह मन्त्रालयमा एसएसपी सिंह विरुद्ध उजुरी दर्ता गरेका छन् । गृह मन्त्रालयले घटना छानबिन गर्न प्रहरी प्रधान कार्यालयलाई लिखित निर्देशन दिएको छ । रातोपाटीबाट
