ABC (क्राईमबिट)
पर्सा । भारत तर्फ बेचबिखनका लागि लगिरहेको अवस्थामा वीरगञ्जको शंकराचार्य गेट नजिकैबाट एकजना बालिकालाई उद्धार गरिएको छ ।
पर्सा प्रहरीले माइती नेपाल संस्थासँगको सहकार्यमा भारततर्फ बेचबिखनका लागि लागिरहेको अवस्थामा १४ वर्षीय बालिकाको उद्धार गरेको हो । बालिकालाई भारत तर्फ लगिरहेका पुरुषलाई भने प्रहरीले नियन्त्रणमा लिएको छ ।
अर्घाखाँची गइरहेको भनेर भारततर्फ लैजान खोजिरहेको अवस्थामा अर्घाखाँची जिल्लाको सन्धिखर्क नगरपालिका वडा नम्बर ७ घर भई हाल चितवन जिल्लाको भरतपुर उपमहानगरपालिका वडा नम्बर १ पोखरा बसपार्क बस्दै आएका २८ वर्षीय राजु अधिकारीलाई प्रहरीले नियन्त्रणमा लिएको हो ।
बालिकासँगै रहेका अधिकारीलाई वीरगञ्जस्थित नेपाल-भारत सीमामा रहेका माइती नेपालका सीमा पहरेदारहरूले सोमबार साँझ पौने ५ बजेको करिवमा रोएका थिए ।
पर्साका प्रहरी नायव उपरीक्षक (डिएसपी) ओमप्रकाश खनालका अनुसार बैतडीको लिस्टी नगरपालिका वडा नम्बर २ की १५ वर्षीया बालिकालाई अधिकारीले अर्घाखाँची भनेर वीरगञ्जसम्म ल्याएका थिए । बालिका माघ ७ गतेदेखि हराइरहेकी थिइन् । बालिकाका अभिभावकले उनि हराईरहेको बारेमा प्रहरीलाईसमेत जानकारी गराएको डिएसपी खनालले बताए ।पर्सा प्रहरीका प्रवक्तासमेत रहेका डिएसपी खनालका अनुसार विगत एक महिनादेखि अधिकारी बालिकासँग फोन मार्फत सम्पर्कमा थिए । फोन मार्फतनै प्रेम जालमा फसाई विवाह गर्छु भन्दै अधिकारीले बालिकालाई भेट्न बोलाएर विभिन्न स्थान हुँदै झुक्याएर वीरगञ्ज बसपार्कसम्म ल्याएका रहेछन् ।
बालिकालाई अधिकारीले पाँच मिनेटमा घर पुगिन्छ भनेर भारततर्फ लगिरहेको अवस्थामा माइती नेपालका पहरेदारहरुले रोकेर केरकार गर्दा शंकास्पद लागेपछि उनीहरुलाई आफ्नो नियन्त्रणमा राखेको डिएसपी खनालले बताए ।
प्रहरीले अधिकारीउपर मानव बेचबिखन मुद्दा चलाइए पर्सा जिल्ला अदालतबाट ७ दिन म्याद थप गरेर अनुसन्धान अगाडी बढाएको डिएसप खनालले जानकारी दिए ।
