(ABC-Sanchar)
बाँके । माघ पहिलो सातासम्म भारतबाट घर फर्किनेको चाप निकै बढेको थियो । कञ्चनपुरको गड्डाचौकी र कैलालीको गौरीफन्टा दुवै नाकाबाट दैनिक एक/एक हजार बढीको संख्यामा नेपालीहरू घर फर्किरहेका थिए । घर फर्किने अधिकांशमा संक्रमण पनि देखिने गरेको थियो ।
एक सातायता भारतबाट घर फर्किनेको संख्या आधाले घटेको छ । भारतमा कोरोना संक्रमणको दर निरन्तर घट्दै गएको र बन्द भएको काम सुचारु हुन थालेका कारण घर फर्किनेको संख्या कम हुँदै गएको हो । अहिले दैनिक घर फर्किनेको संख्या ४/५ सय छ । घर फर्किनेको चाप बढेका बेला नाकामा दैनिक एक सय बढीमा संक्रमण पनि पुष्टि भइरहेको थियो ।
‘घर फर्किनेको चाप कम भएसँगै संक्रमित पनि कम देखिएका छन्,’ गड्डाचौकीस्थित हेल्थ डेस्कका सिनियर अहेव तर्कराज भट्टले भने, ‘भारतबाट घर फर्किनेको संख्या आधाले घटेको छ ।’ उनका अनुसार माघ पहिलो सातासम्म कामदारको ठूलो समूह घर फर्किएको थियो । तर अहिले फर्किने फाटफुट मात्रै कामदारहरू छन् । बाँकी हप्ता दस दिनमा ओहोरदोहोर गरिरहने नै छन् ।
गड्डाचौकी नाकाबाट शनिबार ४८२ जना भित्रिए । जसमध्ये ३४ जनामा कोरोना संक्रमण देखिएको छ । शुक्रबार भित्रिएका ५१४ मध्ये ३७ जनामा संक्रमण देखियो । बिहीबार भित्रिएका ५३७ मध्ये ५४ मा संक्रमण पुष्टि भएको अहेव भट्टले बताए । एक साताअघिसम्म गड्डाचौकी नाकामा दैनिक सय बढीमा संक्रमण पुष्टि भइरहेको थियो । भारतबाट फर्किनेको संख्या घटेका कारण संक्रमित कम देखिए पनि संक्रमणको दर भने अझै घटेको छैन । अहिले पनि घर फर्किनेमध्ये १० प्रतिशतभन्दा बढीमा संक्रमण देखिने गरेको छ ।
