(ABC=SANCHAR)
बाँके । नेपाली कांग्रेसका प्रवक्ता डा. प्रकाश शरण महतले स्थानीय तह निर्वाचन लक्षित गठबन्धनको सम्भावनालाई नकार्न नसकिने बताएका छन् ।
नेपाल प्रेस युनियन बाँकेले शनिबार नेपालगंजमा गरेको पत्रकार भेटघाटमा नेता महतले गठबन्धनको मोडालिटी भने तयार भइ नसकेको बताए ।
स्थानीय तहको परिस्थितिका आधारमा पार्टीको केन्द्रीय समितिले नीति बनाउने र सोही नीति अनुसार अगाडि बढ्ने उनले जानकारी दिए ।
अहिले शुद्ध निर्णय प्रक्रियामा नपुगुञ्जेलसम्म पार्टीलाई बलियो पार्ने, र बढीभन्दा बढी जनतालाई नेपाली कांग्रेससँग जोड्ने लक्ष्य हुनुपर्ने उनको तर्क थियो ।
काँग्रेसको केन्द्रीय समिति बैठक चैत ११ गते बस्ने हुँदा त्यसैले कसरी जाने भन्ने दिशा निर्देश गर्ने उनले स्पष्ट पारे । उनले चैत महिना भित्र स्थानीय तहका उम्मेदवारको टुंगो लगाउने कोशिस हुने बताए ।
सत्तामा पुगेर पार्टीको नीति, कार्यक्रम लागु गर्ने र जनताप्रति समर्पित हुनका लागि पार्टी निर्माण गरेको उल्लेख गर्दै कांग्रेस कुनै क्लब नभएको प्रवक्ता महतले प्रष्ट्याए।
एमसिसीका विषयमा विपक्षी दलले भ्रमको खेती गरेको महतले आरोप बताए । एमसिसी अनुदान विकास सहयोग मात्र भएको र यो नेपालको आवश्यकता अनुसार सहयोग स्वरुप आएको उनले दाबी गरे । कार्यक्रम नेपाल प्रेस युनियन बाँकेका अध्यक्ष अर्जुन वलीको अध्यक्षतामा भएको हो ।
