ABC (क्राईमबिट)
काठमाडौं । नेपाल प्रहरीका अतिरिक्त प्रहरी महानिरीक्षक (एआईजी) हरिबहादुर पालको उक्साहटमा तीन जना नायब महानिरीक्षकहरू (डीआईजी)ले उजुरी गर्न पुगेको खुलासा भएको छ ।
अबको एक महिनामा अनिर्वाय अवकासमा जान लागेका एआईजी पालले एआईजी बढुवामा भाँजो हाल्न डीआईजी घनश्याम अर्याललाई उचालेर लोकसेवा आयोगको उजुरी सुन्ने सचिवालयमा उजुरी दिएको स्रोतले जनाएको छ ।
डीआईजी घनश्याम अर्याल एआईजी पालको उक्साहटमा उजुरी दिन पुगेपछि डीआईजीद्वय प्रकाशजंग कार्की र ईश्वरबाबु कार्की पनि पछिपछि लागेर उजुरी दिन पुगेको उच्च स्रोतको भनाइ छ ।
गृह मन्त्रालयले डीआईजीहरू बसन्त पन्त, धिरजप्रताप सिंह र रविन्द्रबहादुर धानुकलाई एआईजी बढुवामा सिफारिस गरेको थियो । मन्त्रिपरिषदबाट एआईजीमा बढुवा गर्ने बेला एआईजी हरिबहादुर पाल र एसएसपी अशोक सिंहको हर्कतले नेपाल प्रहरीभित्र तनाबको स्थिति बनेको छ ।
नेपाली कांग्रेस नेतृत्वको सरकार आउनेवित्तिकै सुदूरपश्चिमको नाता लगाएर शैलेस थापा क्षेत्रीलाई हटाएर पाल आफू आईजीपी बन्न खोजेका थिए । तर, प्रधानमन्त्री शेरबहादुर देउवाले पालको कुरामा रुचि नदेखाएपछि जिल परेर रानीपोखरीमा थन्किएका छन् ।
आईजीपी थापासँगै पाल पनि वैशाख २० गतेतिर उमेर हदका अनिर्वाय अवकासमा जाँदैछन् ।
तीन जना डीआईजीलाई उचालेर उजुरी गर्न पठाएका पालको योजनाले घनश्याम अर्याल, प्रकाशजंग कार्की र ईश्वरबाबु कार्की तनाबको अवस्थामा पुगेका छन् ।
अहिले उनीहरू एआईजी पालको उक्साहटमा लागेर नेपाल प्रहरीको चेनअफ कमाण्ड भत्काउने कार्य गरेको भनेर पछुताएका छन् ।
यी तीन जना डीआईजीलाई उजुरी गर्न उचालनेमा एसएसपी अशोक सिंह पनि छन् । एआईजी पाल र एसएसपी सिंहबीच निकै घनिष्ट सम्बन्ध छ । पाल र सिंह मिलेर तीन जना असन्तुष्ट डीआईजीहरूलाई उचालेको स्रोतले जनाएको छ ।
एसएसपी सिंहले काठमाडौं प्रहरीको प्रमुख हुँदा कीर्ते काण्डका तत्कालीन डीआईजी नवराज सिलवाललाई सफाइ दिन प्रतिवेदन बनाएका थिए । तत्कालीन प्रधानमन्त्री खड्गप्रसाद ओलीलाई खुसी बनाउन एसएसपी सिंहले विवादित व्यक्ति सिलवाललाई सफाइ दिन ठूलो भूमिका खेलेका थिए ।
एआईजीको बढवा प्रकरणमा पालसँग मिलेर चलखेल गरेपछि आफू एसएसपीबाट डीआईजीमा बढुवा हुन सहज हुने सिंहको बुझाइ छ । चेक काण्डमा परेका एसएसपी सिंह विवादित प्रहरी अधिकारी मानिन्छन् ।
रि-पब्लिका दैनिकबाट
