(ABC-Sanchar)
बारा । निजगढको जंगल नजिकका गाउँमा बाघ पसेर पशुचौपाया खाने, जंगली हात्ती, बँदेल, नीलगाईले बालीनालीमा क्षति पुर्याएपछि स्थानीय आतंकित बनेका छन् । पर्सा राष्ट्रिय निकुञ्जसित जोडिएको निजगढ नगरपालिकाको वडा १ र २ सिंगौल गाउँ, वडा नं ११, १२ तथा १३ को रतनपुरी, लाल, कुलिया, डम्बरपुरलगायतका बस्तीमा ५ महिनादेखि बाघसहितका वन्यजन्तुले चौपायाहरु खाइदिँदा स्थानीयमा त्रास फैलिएको हो ।
दुई महिनाअघि निजगढ–काठमाडौं द्रूतमार्ग निर्माणमा खटिएका नेपाली सेनाको ब्यारेकमा समेत बाघ पसेको थियो । निकुञ्जसित जोडिएको उक्त क्षेत्रमा जनज्योति, तपोभूमि र पशुपति सामुदायिक वन छन् । तीनै सामुदायिक वनमा बस्ने जंगली जनावरहरुले आसपासका गाउँ पसेर आतंक मच्चाएको वडा १३ का वडाध्यक्ष सूर्यबहादुर घलानले बताए ।
‘निकुञ्जले बफर प्रतिरोधक छेकबार पनि लगाएको छैन । त्यही भएर बाघ मात्र होइन, हात्ती र अन्य वन्यजन्तुले बालीनाली, केरा खेती नष्ट गर्नेदेखि बाघले यस अवधिमा कम्तीमा २० वटा बाख्रा र एउटा पाडोलाई खाइदिएको हो,’ उनले भने ।
हात्तीले पहिला-पहिला कोल्हवी र रौतहटको जंगल आसपास आतंक मच्चाए पनि अहिले यी क्षेत्रमा सताउने गरेको वडाध्यक्ष घलानले बताए । उनले भने, ‘मानिसलाई समेत कुन बेला के हुन्छ भनेर डर फैलिएको छ,’ त्यसैले वन्यजन्तुलाई रोकथाम गर्न नगरपालिकाका प्रमुख, अन्य जनप्रतिनिधिसहित निकुञ्जका अधिकारीहरुसित स्थानीयहरुबीच निजगढ नगरपालिकामा सोमबार छलफल गरिएको छ ।’ उनले क्षतिपूर्तिका लागि निकुञ्जले पहल गर्नुपर्ने माग गरेका छन् ।
निकुञ्जका सूचना अधिकारी सूर्य खड्काले वन्यजन्तुलाई निकुञ्ज क्षेत्रभित्रै राख्न सकिने अवस्था नभए पनि सरकारीस्तरबाट सुरक्षाका उपायबारे योजना बनाउन जरुरी भएको बताए । उनका अनुसार छिमेकी जिल्ला रौतहटमा बाघले मान्छे मारेको र बाराको अमलेखगन्ज तथा कोल्हवी क्षेत्रमा कैयौंपटक मान्छेहरुमाथि आक्रमण भइसकेको छ ।
यस्तै चुरे दोहन तथा वन विनाशले त्यस क्षेत्रमा पानीको स्रोत सुक्दै गएपछि वन्यजन्तुहरु आहार र बासको लागि दसगजा (जंगलको दक्षिणी भाग) तिर गएर मानवसँगै बालीनाली नष्ट गर्न थालेको स्थानीय बताउँछन् । जंगली हात्ती, बँदेल र नीलगाईले हुलसहित पसेर क्षति पुर्याउन थालेको उनीहरूको भनाइ छ। ‘बिघाको बिघा बाली नष्ट गर्दा वन र निकुञ्जले वास्ता गरेको छैन,’ सिम्रौनगढ नगरपालिका-८ कचोर्वाका कमलेश यादवले भने ।
चुरे र जंगलमा पानीको स्रोत कम भइरहेकोले वन्यजन्तुहरु दसगजातर्फ गइरहेको पर्सा राष्ट्रिय निकुञ्जका अधिकारीहरु बताउँछन् ।
