(ABC-Sanchar) महोत्तरी । सिरहा मिर्चैयाकी ममता रायले ४ वर्षअघि आफ्नै मिल्ने साथीसँग २ लाख रुपैयाँ ऋण लिइन् । त्यसबापत उनले जग्गा दृष्टिबन्धक राखेकी थिइन् । साथी सुजता साहसँग ऋण लिएको रकमको तमसुक पनि बनाएकी थिइन् ।
तीन गुना रकम तिर्ने सम्झौताको तमसुक देखाउँदै उनले सुजतालाई ३५ लाख रुपैयाँ दिइसके पनि ऋण नसकिएको बताइन् । दृष्टिबन्धक राखेको आफ्नो बजार क्षेत्रको ६ धुर र माइतीको १० धुर जग्गासमेत लिएर सुजताले अरूलाई बिक्री गरिसकेकाले अन्यायमा परेको उनले बताइन् ।
आफ्नै साथीबाट धोका पाएपछि राय अहिले मिटरब्याजीविरुद्धको आन्दोलनमा सहभागी छिन् । मिटरब्याजीविरुद्ध सुरु भएको बर्दिबासबाट काठमाडौंसम्मको पैदल यात्रामा रायले १४ वर्षकी छोरीलाई पनि साथै लिएर हिँडेकी छन् । ऋण नतिरेको भन्दै छोरीलाई समेत बलात्कार गर्ने धम्की विभिन्न समूहबाट पाएपछि उनले ५ कक्षामा पढ्ने छोरीलाई ८ महिनादेखि विद्यालय पठाउन नसकेको भक्कानिँदै सुनाइन् । ‘मेरो परिवार हाँसीखुसी चलिरहेको थियो,’ ममताले भनिन्, ‘साथीले धोका दिएपछि आँसु पिउँदै न्यायका लागि भौतारिएकी छु ।’ वैदेशिक रोजगारीका लागि श्रीमान् कतारमा रहेकाले छोरा माइतीमा छाडेर आन्दोलनमा हिँडेको उनले बताइन् । अब काठमाडौं पुगेर न्याय पाएर मात्रै फर्किने उनको अठोट छ । सिरहा औरही गाउँपालिकाका मनोजकुमार पासवान पनि मिटरब्याजीविरुद्धको आन्दोलनमा छन् । बुबालाई वैदेशिक रोजगारीमा जान ५० हजार रुपैयाँ ऋण दिने गाउँकै हरिनन्दन यादवले आफ्नो सबै सम्पत्ति हडपेको उनको आरोप छ । साहुले ७ कट्ठा जग्गा हडपेपछि घरबारविहीन बनेका उनले सरकारले न्याय दिनुपर्ने मागसहित काठमाडौं हिँडेको बताए कान्तिपुर।
