ABC (क्राईमबिट) काठमाडौँ । प्रहरीले काठमाडौँको नयाँ बसपार्कमा स्विप अपरेसन चलाएर ७७ जनालाई पक्राउ गरेको छ । बसपार्क क्षेत्रमा अवैध गतिविधि गरेको आरोपमा उनीहरूलाई पक्राउ गरिएको जिल्ला प्रहरी परिसर काठमाडौँका डिएसपी निरञ्जनदत्त भट्टले बताए ।
बुधवार राति प्रहरीले सो क्षेत्रमा ठगी र यौन धन्दा चलाउनेहरू विरुद्ध स्विप अपरेसन सञ्चालन गरेको थियो । टोखा नगरपालिका स्थित वडा नम्बर–२६ र वडा नम्बर–९ मा सञ्चालित गेस्ट हाउस, दोहोरी, डान्सबार तथा रात्रि क्लबमा आबद्ध रहेकाहरू पक्राउ परेका छन् ।
डान्सबार लगायतका रात्रि क्लबहरूमा चर्को मूल्य असुलेर ग्राहकलाई ठग्ने गुनासो बारम्बार आउने गरेको छ । पक्राउ पर्नेमा ३६ जना महिला र ४१ जना पुरुष छन् ।
प्रहरी प्रभाग नयाँ बसपार्कले बुधवार थप १५ जनालाई पक्राउ गरेको थियो । आरोपीहरूबारे अनुसन्धान भइरहेको डिएसपी भट्टले जानकारी दिए ! 
