(ABC-Sanchar) काठमाडौं । वाणिज्य बैंकहरुले घटेको ब्याजदर बिहीबार सार्वजनिक गरेका छन्। व्यक्तिगत मुद्दती निक्षेपको ब्याजदर ९.९९ प्रतिशतमा ओर्लिएको छ ।
वाणिज्य बैंकहरुले वैशाख १ गतेदेखि लागू हुने निक्षेपको ब्याजदरमा कटौती गरेका हुन् । नेपाल बैंकर्स संघको बुधबार बिहान बसेको बैठकले निक्षेपको ब्याज दर कटौती गर्ने निर्णय गरेको थियो ।
बैठकले फागुनमा ११ प्रतिशत रहेको साधारण मुद्दतीको ब्याज दर ९.९९ प्रतिशतमा सिमित छ । रेमिटेन्स खातामा भने न्यूनतम एक प्रतिशत थप ब्याज दिएका छन् ।
संघको निर्णय अनुसार मुद्दती मात्र नभएर बचत, संस्थागत र कल निक्षेपको ब्याजदर पनि घटाएको छ। बैंकहरुले संस्थागत निक्षेपकर्ताको ब्याजदर ७.९९ प्रतिशतमा ल्याएका छन् ।
बैंकहरुले बचतमा ५.४ देखि ८.४ प्रतिशतसम्म ब्याजदर दिइरहेका छन् । कल डिपोजिटको ब्याजदर २.७ प्रतिशतमा सिमित छ ।
विकास बैंकहरुले पनि एक वर्षदेखि माथिको मुद्दतीमा एउटा र एक वर्षभन्दा कमको मुद्दतीमा अर्कोथरी ब्याज दिएका छन् । एक वर्षभन्दा कमलाई १०.५० प्रतिशत र त्यो भन्दा माथिको मुद्दतीलाई १०.६० प्रतिशत दिएका छन् । तर रेमिटेन्स खातामा भने ११.६० प्रतिशत छ ।
संस्थागतलाई पनि एक वर्षदेखि माथिको मुद्दतीमा ८.६० र त्यस अवधिभन्दा कममा ८.५० प्रतिशत दिने जाएका छन् । कल खातामा ३ प्रतिशतसम्म मोलतोल गर्न पाइन्छ । बचतमा ६ प्रतिशतदेखि ९ प्रतिशतसम्म दिने जनाएका छन् ।
