(बिदुर एमसी) दाङ । भालुवाङ राज्य पुनर्संरचना हुनुभन्दा दशकौं अगाडिको भालुवाङ्गको नवनिर्मित बसपार्क अझैसम्म सञ्चालनमा आउन सकेको छैन । तत्कालीन भालुवाङ्ग नगर विकास समितिले शुरु गरेको बसपार्क निर्माणकार्य हाल आएर राप्ती गाउँ पालिकाको मातहतमा आएको भए तापनि यो बसपार्क अहिले झन् बिना मालिकको सम्पत्तिजस्तो अलपत्र अवस्थामा छ ।
आम नागरिकहरुले सधैं प्रश्न गर्छन्, कहिले बन्ला यो बसपार्क ? अनि कोही कसैले अनुमान लगाएर त्यस्तै अलपत्रको जवाफ दिने गर्छन्, शायद अझै एकदुई दशक पर्खनुपर्छ होला ।
लुम्बिनी प्रदेशको राजधानी घोषणा भएर पनि त्यो कार्यान्वयनकाे चरणमा छ ।
नगर विकासका पूर्व अध्यक्षहरु गाेरखनाथ कसौधन, मकबूल मियाँ र ओमप्रकाश बुढाथोकीहरुले आआफ्नो कार्यकालमा बसपार्क बिस्तार गरेर अहिलेको अवस्थामा बसपार्क देखिन्छ । जब कि त्यसभन्दा पहिले यो ठाउँ एउटा पहाडी ढिस्कोको रूपमा थियो ।
बसपार्क यस्तो अलपत्र अवस्थामा हुनाले भालुवाङ्गजस्तो बजार ठाउँमा चोकको सडक छेउछाउबाट सवारीसाधनहरु उभ्याउनु र त्यहीँबाट अन्यत्र स्थानका लागि सञ्चालन गर्नुपर्ने निकै अप्ठ्यारो अवस्था छ ।
यदि याे बसपार्क सञ्चालन भएको खण्डमा यातायातका साधनहरुलाई सहज हुनुका साथै आम नागरिकहरुलाई आफ्ना व्यापार व्यवसाय गर्न र अन्य दैनिकीमा पनि निकै फलदायी हुने कुरामा अधिकांश मानिसहरु विश्वस्त छन् ।
