(ABC-Sanchar)
काठमाडौं । नक्कली भुटानी शरणार्थी प्रकरणमा पुर्पक्षका लागि थुनामा रहेका निलम्बित सचिव टेकनारायण पाण्डेसहित १० जनाको ‘मुद्दा लगाउ’मा राख्न आदेश दिएको छ । उक्त मुद्दामा थुनामा रहेका पूर्वगृहमन्त्री बालकृष्ण खाँण र पूर्वमन्त्री टोपबहादुर रायमाझीसहितले मुद्दा पुनरावलोकनका लागि उच्च अदालतमा निवेदन दिएका थिए ।
उच्च अदालत पाटनले बालकृष्ण र टोपबहादुरको निवेदनसँगै बिहीबार सुनुवाइ भएका दशै जनाको अर्को पेशी एकैपटक पेश गर्न आदेश दिएको हो । उच्च अदालतका न्यायाधीशद्वय हरिप्रसाद पौडेल र किरणकुमार पोखरेलको इजलासमा पाण्डेसहित थुनामा रहेका १० जनाको सुनुवाइ भएको थियो । उक्त सुनुवाइपछि बाँकी प्रतिवादीले पनि जिल्ला अदालत काठमाडौंको फैसला पुनरावलोकन गर्न निवेदन गरेको देखिएकाले एकैपटक पेश गर्न आदेश दिएको हो ।
थुनामा राखी मुद्दाको पुर्पक्ष गर्नुपर्ने काठमाडौं जिल्ला अदालतको आदेशविरुद्ध उनीहरु उच्च अदालत पाटन पुगेका थिए । बालकृष्ण र टोपबहादुरलगायतको निवेदन भने पेसीमा चढेको छैन ।
बिहीबार निलम्बित सचिव टेकनारायण, पूर्वसुरक्षा सल्लाहकार डा. इन्द्रजीत राई, नरेन्द्र केसी, सानु भण्डारी, आङटावा शेर्पा, हरिभक्त महर्जन, लक्ष्मी महर्जन, सन्देश शर्मा, शमशेर मिया र गोविन्द चौधरीको निवेदनमाथि सुनुवाइ सकिएको छ ।
