ABC (क्राईमबिट)
दाङ । घोराही जिल्ला ट्राफिक प्रहरी कार्यालय दाङको आयोजनामा ट्राफिक सप्ताह सुरु गरेको छ । बुधबार एक समारोहकाबीच ट्राफिक सप्ताह अभियानको उट्घाटन गरिएको हो ।
बढ्दो सवारी दुर्घटना न्यूनीकरण गर्ने उद्देश्यले जिल्ला ट्राफिक प्रहरी कार्यालय दाङले ट्राफिक सप्ताह सुरु गरेको हो ।
ट्राफिक सप्ताह अन्तर्गत जिल्लामा सातदिनसम्म ट्राफिक नियम तथा सवारी दुर्घटना न्यूनीकरण सम्बन्धी विभिन्न सचेतनामुलक कार्यक्रमहरु गरिने जिल्ला ट्राफिक प्रहरी कार्यालय दाङका ट्राफिक प्रमुख प्रहरी निरीक्षक किरण प्रकाश मल्लले बताए ।
अभियानको सातदिनमा स्कूल र कलेजहरुमा ट्राफिक नियम सम्बन्धी सचेतना, दुर्घटना न्यूनीकरणसम्बधी सरोकारवालाहरुसँग अन्तरक्रिया, ट्राफिक नियम सम्बन्धी होर्डिगं बोर्ड, सरसफाइ लगायतका कार्यक्रमहरुलाई विषेश अभियानका रुपमा सञ्चालन गरिनेछ ।
त्यस्तै ट्राफिक सचेतना सम्बन्धी प्रचार पम्प्लेट वितरण, चालक परिचालक प्रशिक्षण, साना तथा ठुला सवारीमा स्टिकर टाँस गर्ने र ग्रामीण भेगमा समेत सचेतनाका कार्यक्रम गरिने ट्राफिक प्रहरी प्रमुख मल्लले बताए ।
उनले विभिन्न संघ सस्थासङ्ग समन्वय गरेर बजारका सडकहरुमा जेब्रा क्रसिङसमेत निर्माण गरिने बताए ।
नजिकदै गरेको चाडबाडमा हुन सक्ने दुर्घटनालाई लक्षित गरेर ट्राफिक सप्ताह सञ्चालन गरिएको ट्राफिक प्रमुख प्रहरी निरीक्षक मल्लले जानकारी दिए ।
