(ABC-Sanchar)
काठमाडौं । फिल्म ‘बोक्सीको घर’को सफलतापछि यसकी निर्माता एवं मुख्य कलाकार केकी अधिकारी अहिले चर्चामा छिन् । फिल्म उद्योगमा झन्डै १५ वर्ष बिताएकी केकीसँग यो फिल्म निर्माण, सफलता, नेपाली समाजमा महिला र फिल्म उद्योगमा लैंगिक असमानता लगायत विषयमा गरेको कुराकानी :
‘बोक्सीको घर’ नाटकलाई फिल्म बनाउने कुरा कसरी सुरु भएको थियो ?
कोभिडको पहिलो लकडाउनमा तीन महिना घरमै बन्द हुँदा अब के गर्ने त भनेर सोच्दासोच्दै यो आइडिया आएको हो । यदि अवस्था यस्तै भइराख्यो र जिन्दगीमा एउटा मात्रै कथा भन्न पाइने अवस्था आयो भने कुन कथामा फिल्म बनाउने होला त भनेर सोच्न थालें । सन् २०१६ मा हेरेको नाटक ‘बोक्सीको घर’ मेरो दिमागमा बसिरहेको थियो । यो सारै शक्तिशाली नाटक थियो । मैले त्यही कथा सम्झिएँ । हरेक पटक बोक्सी सम्बन्धी समाचार पढ्दा म यही नाटक सम्झिन्थें । मैले यही विषयलाई छानें । कसैले सहयोग गरेन भने एक्लै बनाउन सकिन्छ कि सकिंदैन भनेर बजेट प्लान पनि गरें । सकिन्छ जस्तो लागेपछि लकडाउन खुकुलो भएपछि मैले यस नाटकका लेखक/निर्देशक सुलक्षण भारतीलाई खोजेर भेटें । उहाँलाई यसमा स्क्रिप्ट लेख्न भनें ।
