दाङ । घोराही ट्राफिक प्रहरीले सवारी जाँचमा कडाई गरेको दाबी गरिरहे पनि जिल्लामा सवारी दुर्घटनामा भने कमी आएको छैन । सवारी दुर्घटनामा परेर पछिल्लो पाँच वर्षमा तीन सय ५१ जनाको मृत्यु भएको छ भने घाइते र अंगभंग हुनेहरुको संख्या ठूलो छ । अधिकांश दुर्घटनामा चालकको अटेरी र लापरवाही देखिने गरेको छ ।
सवारी साधन दुर्घटनाका कारण चालु आर्थिक वर्षको हालसम्म दाङमा ९३ जनाको मृत्यु भएको छ भने २ सय ३७ जना गम्भीर घाइते भएको जिल्ला ट्राफिक कार्यालय प्रमुख प्रहरी निरीक्षक राजेश शाहीले जानकारी दिनुभयो । सवारी दुर्घटनाका कारण यस अवधिमा १ सय १२ जना सामान्य घाइते भएको जिल्ला ट्राफिक प्रहरी कार्यालयको तथ्यांकमा उल्लेख छ ।
यस आर्थिक वर्षमा जिल्लामा २ सय ७३ वटा सवारीका साधन दुर्घटनामा परेका छन् भने दुर्घटना हुनेमा सबैभन्दा धेरै मोटरसाइकलको संख्या १ सय ६९ रहेको छ । यस आर्थिक वर्षमा १९ हजार ७ सय ३४ वटा सवारी चालक नियम पालना नगरेका कारण कारवाहीमा परेका छन् । यस्तो कारवाहीबाट १ करोड ५९ लाख ४८ हजार ७ सय २ रुपैयाँ राजस्व संकलन ट्राफिक प्रमुख शाहीले जानकारी दिनुभयो ।
दाङमा सवारी दुर्घटनाका कारण मृत्यु हुनेहरुको संख्या वर्षेनी बढ्दै गएको छ । जिल्ला ट्राफिक कार्यालय दाङको तथ्यांक अनुसार चालु आर्थिक वर्षको ११ औं महिना चलिरहँदा सवारी दुर्घटनामा परेर मृत्यु हुनेको संख्या ९३ पुगेको छ भने अघिल्लो आर्थिक वर्ष २०७९÷०८० मा यसरी मृत्यु हुनेको संख्या ४८ थियो । त्यस्तै आर्थिक वर्ष २०७८÷०७९ मा ८१ जनाले सवारी दुर्घटनामा परेर ज्यान गुमाएका थिए भने २०७७÷०७८ मा यसरी मृत्यु हुनेको संख्या ६५ थियो । त्यस्तै आर्थिक वर्ष २०७६÷०७७ मा सवारी दुर्घटनामा परेर दाङमा ६४ जनाले ज्यान गुमाउनु परेको थियो ।
सवारी जाँचमा तीब्रता
चालकहरुलाई ट्राफिक नियमको पालना गराई दुर्घटना न्यूनीकरण गर्न जिल्ला ट्राफिक प्रहरी कार्यालय दाङले सवारी जाँचमा तीब्रता र कडाई गरेको जनाएको छ । ट्राफिक प्रहरीले सवारी साधन दुर्घटनालाई न्यूनीकरणका लागि पहिलो काम जाँचलाई प्राथमिकता दिएको ट्राफिक प्रमुख राजेश शाहीले बताउनुभयो । सबैभन्दा धेरै चालककै लापरवाहीले गर्दा सवारी साधन दुर्घटना हुने गरेको भन्दै उहाँले चालकलाई सचेत पार्ने र जरिवाना गर्ने गरिएको बताउनुभयो । सवारी साधन जाँचमा गरिएको कडाईले दुर्घटना न्यूनीकरण हुँदै गएको उहाँको दावी छ । हाल जिल्लाभरका २८ स्थानमा नियमित सवारी साधनको जाँच हुने गरेको, सवारी जाँचलाई बढाएपछि कारवाहीमा पर्नेहरुको संख्यामा पनि बृद्धि भएको उहाँको भनाई छ । जाँचलाई नियमित र कडाई गर्दा दुर्घटना र क्षतिमा पनि कमी आएको शाहीले बताउनुभयो । प्रहरीले पार्किङ व्यवस्थान, मोडिफाई गरेका मोटरसाइकल नियन्त्रण, क्षमता अनुसार यात्रु बोक्न निर्देशन दिने, भाडा दर टाँस गर्नेलगायतका काममा चासो दिएको छ ।
