दाङ । भालुवाङ प्युठान जिल्लाको पश्चिमी सिमामा अवस्थित तिरामको लामपोखरा मेला बुधबार सम्पन्न भएको छ । तिहारको पञ्चमी तिथिमा याे मेला लाग्दछ । बि सं २०२६/ २७ सालमा तत्कालीन राष्ट्रिय पञ्चायत सदस्य एवं तिरामका समाजसेवी गिरिराज शर्मा घिमिरेले मेलाको शुरुआत गरेको स्थानीय सरकार प्रमुख तथा माण्डवी गाउँपालिका अध्यक्ष नवराज अधिकारी बताउँछन् । अधिकारीका अनुसार कुनै समय मेलामा ७०/ ७५ नाचहरु आउँथे । तर अहिले त्यो संख्या घटेको भए तापनि स्थानीय सरकारले यसमा पहल गरेका कारणले अब फ़ेरि त्यो नाचको संख्या वृद्धि भएकोमा उनलेे खुशी व्यक्त गरे ।
ऐतिहासिक महत्त्व बोकेको तिराम लामपोखराको मेला परापूर्व कालदेखि चल्दै आएको र हालका दिनहरुमा यसको मौलिकता हराएको जस्तो लाग्न थालेको हो कि भन्नेमा स्थानीय तिराम खरिवाङ निवासी बिष्णु मगरले बताएका छन् । भए तापनि प्युठान र दाङबाट यश मेलामा मनग्गे मानिस आएर रमाइलो गर्ने गरेको बिष्णुकाे भनाइ छ ।
चारैतिर मनोरम हरियाली सल्लेरीको वन । जताततै अग्लाअग्ला पहाडी लेक चुचुराहरु । स्वर्गजस्तै छ, तिराम लामपोखरा । नजिकै माण्डवी गाउँपालिका वडा नम्बर १, काे कार्यालय भवन पनि त्यहीँ छ । यस्तो ठाउँमा ऐतिहासिक मेला लाग्नु अझै सुनमा सुगन्ध हुन्छ । चाहे केटाकेटी, चाहे तरुनी तन्नेरी, चाहे बूढाबूढी । सबै उमेरका, जातजाति र समुदायका मानिसहरु मेलामा सहभागी भएर भरपूर रमाइलो गरेका देखिन्थे ।
पहिले रातिको समयमा लाग्ने याे मेला विगतको दसवर्षे द्वन्द्व र अन्य व्यवहारिक कारणले लाेप हुन लागेको थियो । याे ऐतिहासिक मेला देशमा गणतन्त्रको प्राप्तिपश्चात् दिनमा आयोजना गर्नुपरेको र त्यसपछि यसमा निकै आकर्षण बढेको वडा नम्बर १ का वडाध्यक्ष बामबहादुर बूढामगरले स्पष्ट पारे ।
दाङ जिल्लामा प्रमुख पर्यटकीय स्थलको रुपमा परिचित बंगलाचुलीशीत सिमाना जोडिएको प्युठान जिल्लाकाे तिराम लामपाेखरामा लाग्ने तिहारकाे पञ्चमी मेला अपेक्षा गरेजति यसको प्रचारप्रसार हुन नसकेको सहभागी वयोवृद्ध नागरिकको गुनासो छ ।
यहाँ निकै आकर्षण गर्ने मारुनी, साेरठी र झाम्रे नाच । अनि त्यसमा रौनकता थप्ने हुटिङहरु पनि कम्ता छैनन् । स्थानीय जनप्रतिनिधि सहित अनेकौं वर्ग समुदायका मानिसहरु मेलामा आउँछन् । स्थानीय उत्पादनको सहभागिता साथै अन्यत्रबाट जाने व्यवसायीको मेलामा देखिन्छन् ।
छिमेकी दाङ जिल्लाको बंगलाचुलीसितै सिमा जोडिएको भएर पनि ऐतिहासिक महत्त्व बोकेको थाम्काडाँडाको उत्तिकै ऐतिहासिक महत्त्व रहेको र त्यससम्बन्धी पृष्ठभूमिमा लाग्ने मेला आफैंमा गौरवको कुरा भएकोमा स्थानीय पालिकाका सूचना अधिकारी तुफान बाबु अधिकारीले उल्लेख गरेका छन् ।
