काठमाडौं । युवती प्रयोग गरेर बलात्कार मुद्दामा फसाउने भन्दै रकम असुलेको आरोपमा फरार मुद्दा दायर भएपछि फरार रहेकी प्रहरी निरीक्षक (इन्सपेक्टर) बिनुकुमारी शाही जिल्ला अदालत ललितपुरमा उपस्थित भएकी छिन् ।
आइतबार उनी जिल्ला अदालत ललितपुरमा उपस्थित भएको र अहिले बयान भइरहेको जिल्ला अदालत ललितपुरका प्रवक्ता रामसजिवन यादवले बताए । न्यायाधीश रिताकुमारी बख्रेलको इजलासमा उनको बयान भइरहेको छ । अदालत उपस्थित भएकी शाहीको बयान सकिएपछि थुनछेक बहस हुने उनले बताए । बहसपछि पुर्पक्षका लागि थुनामा पठाउने वा साधारण तारेख तथा धरौटीमा रिहा गर्नेबारे निर्णय सुनाउने छ । अदालतले थुनामा पठाएमा उनी थुनामै रहने छिन् ।
इन्सपेक्टर शाहीसहित ६ जनालाई प्रतिवादी बनाउँदै आपराधिक लाभ र संगठित अपराधको कसुरमा ललितपुर जिल्ला अदालतमा मुद्दा दायर भएको थियो । मंसिर १३ गते न्यायाधीश टेकराज जोशीको इजलासले घटनाको मुख्य योजनाकार ताज इस्लामलाई थुनामा पठाउने आदेश गरेको थियो । उनीपनि मुख्य प्रतिवादीको दाबी अभियोगपत्रमा गरिएको छ ।
