काठमाडौं । नेपाल प्रहरीको जनपद समूहतर्फ रिक्त प्रहरी जवान पदको लिखित परीक्षाको नतिजामा गडबढी भएको खुलेको छ। लोक सेवा आयोगद्वारा लिइएको उक्त परीक्षाको नतिजामा त्रुटि भएको भन्दै मंगलबार संशोधित सूचना प्रकाशित गरिएको छ।
प्रहरी प्रधान कार्यालयले मंगलबार एक सूचना जारी गर्दै मंसिर १ गते प्रकाशित लिखित परीक्षाको नतिजामा त्रुटि भएको जानकारी दिएको हो। संशोधित सूचनामा २६ जना उम्मेदवारहरूको नाम समावेश गरिएको छ।
सूचनामा भनिएको छ, “नेपाल प्रहरीमा जनपद समूहतर्फ रिक्त प्रहरी जवान पदको लोक सेवा आयोगबाट मिति २०८९/०८/०१ गते प्रकाशित लिखित परीक्षाको नतिजामा अन्यथा हुन गएकोले आयोगको मिति २०८१/०९/१६ गतेको निर्णयानुसार देहायका रोल नं. र नाम भएका उम्मेदवारहरूको नामावली समावेश गरी संशोधित सूचना प्रकाशित गरिएको छ।”
यसअघि मंसिर १ गते सार्वजनिक भएको नतिजामा २,६११ जना उत्तीर्ण भएका थिए र उनीहरूको अन्तर्वार्ता पनि भइसकेको थियो। तर, त्रुटिपछि संशोधित नामावलीमा २६ जना नयाँ उम्मेदवारको नाम थपिएको छ।
यस्तै संशोधित नतिजापछि उत्तीर्ण भएका उम्मेदवारहरूको अन्तर्वार्ता तालिका बुधबार नेपाल प्रहरीको आधिकारिक वेबसाइटमा प्रकाशित गरिने सूचनामा उल्लेख छ।
यस घटनाले लोक सेवा आयोगद्वारा लिइने परीक्षाको प्रक्रिया र पारदर्शितामा गम्भीर प्रश्न उठाएको छ। परीक्षामा भाग लिने उम्मेदवारहरूले निष्पक्ष र विश्वसनीय नतिजा पाउने अपेक्षा गरे पनि यस्तो त्रुटिले उनीहरूको भविष्य अन्योलमा पारेको छ।
परीक्षामा हुने यस्ता गडबढीहरूलाई रोक्न सरकार र सम्बन्धित निकायले तत्काल सुधारात्मक कदम चाल्नु आवश्यक छ।
