दाङ । अदालतबाट फैसला भइसकेपछि फरार रहेका प्रतिवादीहरूलाई पक्राउ गर्ने अभियानलाई तीव्र बनाउँदै प्रहरीले एक सातामा १२ जनालाई नियन्त्रणमा लिएको छ।
जिल्ला प्रहरी कार्यालय दाङ तथा मातहतका इकाइबाट खटिएको टोलीले वैशाख १५ गतेदेखि २१ गतेसम्म सञ्चालन गरेको विशेष खोजतलास अभियानका क्रममा उनीहरूलाई पक्राउ गरिएको हो।
प्रहरीका अनुसार विभिन्न मुद्दामा दोषी ठहर भई लामो समयदेखि फरार रहेका प्रतिवादीहरूलाई जिल्लाका विभिन्न स्थानबाट पक्राउ गरी फैसला कार्यान्वयनका लागि दाङ जिल्ला अदालत, घोराहीमा पेश गरिएको छ। पक्राउ परेका व्यक्तिहरूले अदालतको आदेश पालना नगरी फरार रहँदा कानुनी प्रक्रिया प्रभावित हुँदै आएको थियो।
उक्त अवधिमा पक्राउ परेका १२ जनामध्येबाट कुल ५ हजार रुपैयाँ जरिवाना असुल हुन बाँकी रहेको र उनीहरूलाई ४ वर्ष ९ महिना १० दिन कैद सजाय तोकिएको विवरण सार्वजनिक गरिएको छ। पक्राउसँगै अब सजाय कार्यान्वयनको प्रक्रिया अघि बढाइएको प्रहरीले जनाएको छ।
फैसला कार्यान्वयनलाई प्रभावकारी बनाउन प्रहरीले फरार प्रतिवादीहरूको विवरण संकलन, निगरानी तथा सूचनाका आधारमा खोजी कार्यलाई प्राथमिकताका साथ अघि बढाएको थियो। यस अभियानले कानुनी शासन सुदृढ बनाउन र अदालतका निर्णय कार्यान्वयनमा सहयोग पुग्ने विश्वास गरिएको छ।
जिल्ला प्रहरी कार्यालय दाङले अदालतबाट फैसला भइसकेपछि फरार रहने प्रवृत्ति नियन्त्रण गर्न आगामी दिनमा पनि यस्ता अभियानलाई निरन्तरता दिने जनाएको छ। साथै, कानुनको पालना गर्न र अदालतका निर्णय कार्यान्वयनमा सहयोग पुर्याउन सबै सरोकारवालालाई आग्रह गरिएको छ।
