काठमाडौं । नेपाल प्रहरीको इन्स्पेक्टर हुँ भन्दै ठगी गर्दै आएका युवक पक्राउ परेका छन् । काठमाडौं मनोहराका सुदीप थापालाई काठमाडौं उपत्यका अपराध अनुसन्धान कार्यालयले पक्राउ गरेको हो । थापाले इन्स्पेक्टरको परिचयपत्र बनाउने मात्र होइन , इन्सपेक्टरको फुली सहितको प्रहरीको यूनिफर्म नै लगाएर हिड्ने समेत गरेको खुलेको छ ।
उनले विदेश पठाउने भनेर तीनजनाबाट ६९ लाख ठगी गरेको उजुरी प्रहरीमा परेको छ । अनुसन्धानमा आबद्ध प्रहरी अधिकारीका अनुसार कतिपय अवस्थामा उनी युनिफर्म नै लगाएर प्रहरी कार्यालयमा समेत पुग्थे । प्रहरी कार्यालय पुगेर जुनियर प्रहरीलाई आफु इन्सपेक्टर भएको भन्दै भ्रममा पारेर सलाम समेत गर्न लगाउने गरेको अनुसन्धानमा खुलेको छ । पीडितहरुलाई विश्वासमा पार्न उनले यस्तो शैली अपनाएका हुन् । आफू उत्कृष्ट काम गरेबापत सइबाट विशेष बढुवा भएर इन्स्पेक्टर भएको भन्दै प्रहरीलाई नै झुक्याएको समेत पाइएको छ ।
