काठमाडौं । हाल देशमा पश्चिमी वायुको प्रभाव छ । कर्णाली प्रदेश र सुदूरपश्चिम प्रदेशमा पश्चिमी न्यूनचापीय प्रणालीको पनि आंशिक प्रभाव रहेको जल तथा मौसम विज्ञान विभाग मौसम पूर्वानुमान महाशाखाले जानकारी दिएको छ ।
महाशाखाका अनुसार अहिले बिहान कर्णाली, सुदूरपश्चिम प्रदेशको पहाडी भू–भागमा आंशिक बदली तथा बाँकी भू–भागमा मौसम मुख्यतया सफा रहनेछ । साथै, तराइका धेरै भू–भागहरूमा हुस्सु÷कुहिरो लागेको अवस्था छ ।
सोमबार कर्णाली तथा सुदूरपश्चिम प्रदेशका केही भूभागमा आंशिक बदलीको सम्भावना छ भने बाँकी भू–भागहरूमा मौसम सफा रहने महाशाखाले जनाएको छ ।
यस्तै, आगामी २४ घन्टाका लागि कर्णाली प्रदेशको उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना छ । साथै बिहानको समयमा देशका तराई तथा उपत्यकाका धेरै स्थानहरूमा हुस्सु÷कुहिरोको सम्भावना रहेकोले दैनिक जनजीवन, कृषि, स्वास्थ्य,यातायात तथा हवाई उडानमा असर पर्न सक्नेतर्फ सचेत रहन महाशाखाले अनुरोध गरेको छ ।
