धादिङ । जिल्ला अदालतमा विचाराधीन एक जालसाजी मुद्दाको सुनुवाइका क्रममा विपक्षी पक्षका कानुन व्यवसायीबाट इजलासभित्र र अदालत परिसरमै अभद्र व्यवहार, धम्की तथा लैंगीक अपमान भएको आरोपसहित एक अधिवक्ताले छानबिन र कारबाहीको माग गर्दै नेपाल कानुन व्यवसायी परिषद्मा निवेदन दर्ता गराएकी छन्।
निवेदन अनुसार, मुद्धा नम्बर ०८२-०४-०००२ को जालसाजी मुद्दामा बादीको तर्फबाट कानुन व्यवसायी नियुक्त भएकी अधिवक्ता तोला कुमारी पाठकले प्रतिवादी पक्षका अधिवक्ता गुणराज आचार्यबाट पेशागत आचारसंहिता उल्लङ्घन हुने गरी निरन्तर धम्की, अपशब्द र होच्याउने व्यवहार भोग्नुपरेको दाबी गरेकी छन्। सो मुद्दा धादिङ जिल्ला अदालतमा विचाराधीन छ।
निवेदनमा उल्लेख भएअनुसार, उक्त मुद्दाको विषयवस्तु रहेको जग्गामा विपक्षी पक्षका अधिवक्ताको व्यक्तिगत तथा पारिवारिक स्वार्थ गाँसिएको आसंका गरिएको छ। निवेदकले २०८२ साउन २८ गते अदालत परिसरमै आफूलाई मुद्दा फिर्ता लिन दबाब दिइएको, नमान्दा धम्की तथा लैंगीक अपमानजनक शब्द प्रयोग गरिएको आरोप लगाएकी छन्। त्यसैगरी, २०८२ पुस ८ गते प्रमाण बुझ्ने क्रममा इजलास बाहिर र इजलासभित्र समेत अपशब्द, धम्की र दुर्व्यवहार भएको र उक्त व्यवहारका कारण आफू इजलासबाट भावनात्मक अवस्थामै फर्किनुपरेको निवेदनमा उल्लेख छ।
निवेदकका अनुसार, यस प्रकारका क्रियाकलापले कानुन व्यवसायीको पेशागत मर्यादा र आचारसंहिताको उल्लङ्घन भएको छ। उनले कानुन व्यवसायीको पेशागत आचरण सम्बन्धी नियमावली, २०७९ का सम्बन्धित प्रावधानविरुद्ध कार्य भएको उल्लेख गर्दै निष्पक्ष छानबिन र शीघ्र कारबाहीको माग गरेकी छन्।
निवेदनसँगै २०८२ पुस ८ गतेको इजलासभित्रको सीसी क्यामेरा फुटेज प्रमाणका रूपमा संलग्न गरिएको छ। साथै, घटनाका साक्षी रहेका अदालतका कर्मचारी तथा प्रत्यक्षदर्शीहरूबाट पनि बुझ्न माग गरिएको छ।
उक्त निवेदनमा आरोपित अधिवक्ताले आफू नेपाल बार एशोसिएसनसँग पूर्वसम्बद्ध रहेको दाबी गर्दै दबाब र धम्की दिएको उल्लेख गरिएको छ।
